Dili- Australian Institute of Police Management halao seminariu ba Ofisial Inspetor no Sarjentu sira atu halao servisu diak liutan hodi servi povu iha baze.
Komandante CFP Superintendente Xefe Arquimino Ramos hateten seminariu nee halao ba ofisial mediu sira hanesan Inspetor no Sarjentu sira tanba sira maka lor-loron liga direta situasaun iha terrenu entaun persija iha formasaun hanesan nee para sira bele hetan prespetiva foun husi Australia, Nia hatoo asuntu neé ba Jornalista sira iha CFP Comoro Dili, tersa (21/06).
Nia haktuir tan formasaun neé presija kontinua hodi hadia kualidade atendementu nuneé sosiedade bele hetan atendementu neébe maka diak atu instituisaun seguransa neé bele hetan respeitu.
Seminariu neé foka liu konaba Lideransa iha Asaun neébe maka inportante hodi lori konsetu no teoria hotu neébe maka hetan tau iha asaun no pratika servisu lor-loron nian hodi halo buat ruma neébe maka foun no halo mudansa ba ita nia instituisaun.
“Se lideransa neébe maka la halo mudansa maka presija kapasita bebeik. Konseitu lideransa neebe mak diak tenke halo mudansa ba instituisaun no sosiedade nia diak,” dehan Ramos.
Iha seminariu neé fasilitador sira sei halo selesaun ba partisipante hirak neébe maka partisipasaun diak no sei rekomenda atu kontinua kursu iha Australia, ida neé koperasaun neébe maka ita iha tia ona ho parseria ho Australia Federal Police (AFP) iha programa Timor-Leste Police Development Program (TLPDP) nian no agora ita kontinua iha nivel hotu-hotu hanesan Ezekutivu, Superior no Mediu.
Formasaun neé fo husi Australian Institute of Police Management ho Fakuldade Pacific Faculty of Policing neébe maka uluk sira dezenvolve ona diploma ba Jestaun Ezekutivu Polisial iha CFP no agora kontinua ho kursu ba Lider sira iha nivel mediu nomos first line manager.
seminariu durante loron tolu (21-23/06) ho Partisipante hamutuk nain 40 mai husi Komandu PNTL munisipiu no nasional, seminariu hanesan sei kontinua ba sira seluk iha fulan agostu no setembru.
Alende neé iha mos programa kursu ho duransaun tempu badak iha Australia neébe maka sei halo selesaun ba sira neébe maka koñesementu lingua ingles diak hodi kontinua eskola iha Australia Institute of Police Management ba kursu badak no Post Graduasaun iha area polisiamentu nian.
Programa neé hetan apoiu finanseru husi TLPDP ho total orsamentu $40.000
Abertura seminariu neé prezidi husi Segundu Komandante Jeral Komisariu Polisia Mateus Fernandes akompaña husi Komandante CFP, Komandante TLPDP no fasilitador husi Australian Institute of Police Management. Media PNTL
