Dili- Polisia Nasional Timor-Leste (PNTL) sei nafatin alerta hodi fo seguransa ba povu no nasaun to’o formasaun VII governu konstitusional.
Komandante Komandu Operasaun Superintendente Xefe Henrique da Costa hateten tuir planu operasaun ne’ebe maka trasa tia ona servisu alerta Polisia sei termina wainhira formasaun VII governu konstitusional hotu, Nia hato’o asuntu ne’e ba jornalista sira iha Kuartel Jeral PNTL Kaikoli Dili Tersa (25/07).
Komandante ne’e haktuirtan katak PNTL halo seguransa maximu hahu Kampaña, Eleisaun Parlamentar to’o agora tanba ne’e husu ba parte hotu atu laran boot hodi simu rezultadu Eleisaun nune’e la hamosu fali problema.
Hafoin kampaña iha loron 20/06 to’o 19/07 no Eleisaun Parlamentar iha loron 22/07 to’o ohin loron situasaun jeral seguransa iha teritoriu laran tomak lao normal, sei iha ambiente eleisaun nia laran tanba prosesu apuramentu seidauk remata.
Parte seguransa nafatin mantein seguransa iha edifisiu Comisaun Nasional Elisaun (CNE) no Sekretariadu tekniku Administrasaun Eleitoral (STAE) hodi fo seguransa ba prosesu apuramentu nasional.
Insidente 15 no asidente 2 akontese durante prosesu ELPAR
Tuir dadus ne’ebe maka PNTL rezista durante prosesu Eleisaun Parlamentar (ELPAR) ne’ebe maka halao iha loron 22/07 lao normal no kapas tanba ema hotu nia kontribusaun ba seguransa tanba ne’e seguransa durante periodu ELPAR lao diak no laiha insidente boot ne’ebe maka maka fo inpedimentu ba prosesu Eleisaun to’o kontajen de votus husi munisipiu mai Dili no agora falta deit voletim de votus husi Portugal no Australia maka seidauk to’o mai CNE.
Durante kampaña no Eleisaun Parlamentar insidente hamutuk 15 no asidente rua, ne’ebe maka akontese iha munisipiu Aileu insidente 6, Ainaro 2, Viqueque 3 no asidente 1 iha Bobonaro no Dili asidente 1, PNTL halo hela prosesu ba kazu insidente no asidente hirak ne’e.
Insidente (krime eleitoral) ne’ebe maka akontese hanesan hasai foto iha kavina (iha Ainaro no Dili postu administrativu Metinaro), iha Aileu postu administrative Remixeu provokasaun atu asaltu malu no ema deskoñesidu hatun bandeira partidu politiku no Viqueque ema deskoñesidu tuda wainhira fila husi kampaña, motor soke malu iha Ermera, kareta nia besi monu sai no rejulta vitima ida mate iha Dili.
Husi insidente 15 ne’e insidente 8 maka iha keixa no polisia halo prosesu no 7 seluk polisia rezista deit.
Alende ne’e Durante prosesu Kampaña Parlamentar PNTL prende motor no kareta publiku, privadu no governu husi munisipiu 13 no maioria husi Dili hamutuk 1700 tanba laiha dokumentus, karta kondusaun, Xapa matrikula, espelu no infrasaun seluktan.
Prosesu tomak Komandu munisipiu maka halo, no infrator sira balu ba selu ona koima sira foti hikas sira nia transporte no balu ne’ebe maka seidauk sira nia sasan evidensia sei iha kantor, ita husu ba motor no kareta nain sira atu kumpri hodi selu koima no foti hikas sira nia transporte. Media PNTL
