Dili, Komandu Polísia Nasional Timor-Leste (PNTL) liu husi Komandu Administrasaun PNTL iha tersa ne’e (25/07) asina Memorandum of Understanding (MoU) ho Bank Rakyat Indonesia (BRI) Timor-Leste ne’ebe maka halo investimentu no kompete ho banku seluk iha Timor-Leste.
Komandante Administrasaun PNTL Superintendente Xefé Mateus Fernandes ne’ebe reprezenta Komandu PNTL hateten instituisaun PNTL agradese ba presensa BRI ne’ebe ajuda tebes povu Timor-Leste liu-liu ba membru PNTL.
“Kooperasaun servisu ne’e prosesu ida diak tebes, ema hotu tenke sente honradu hodi bele asegura diak kooperasaun ida ne’e ho harmonia entre instituisaun no entre nasaun”, tenik Komandante Asdministrasaun PNTL.
Superintendente Xefe Mateus Fernandes lori Komandu PNTL nia naran sente kontenti no hato’o agradesimentu ba BRI tanba bele tama mai Timor-Leste hodi halo investimentu atu ajuda Timor oan sira.
Iha fatin hanesan General Manager BRI B. Bernandus Nadapdap agradese tebes ba oportunidade ne’ebe maka PNTL fó ba BRI ne’ebe maka ninia ezistensia iha Timor-Leste foin fulan haat.
“Loron ida ne’e maka loron ida ne’ebe ita hotu hein no espera katak ho kooperasaun servisu ne’e hanesan pasu dahuluk diak ida ba instituisaun rua ne’e hodi kontinua iha futuru”, hateten General Manager BRI.
B. Bernandus Nadapdap iha esperansa ba PNTL atu bele susesu liu tan hodi ezerse sira nia funsaun nune’e mós ba BRI Timor-Leste. BRI mós iha oportunidade ne’e hato’o apresiasaun ba PNTL no povu Timor-Leste ba realizasaun eleisaun parlamentar 2017 ne’ebe lao diak ho paz no trankuilidade.
Media PNTL.
