Dili-Komandu Polisia Nasional Timor-Leste (PNTL) munisipiu Dili to’o oras ne’e dadaun sei kontinua mantein seguransa iha edifisiu Comissão Nacional Eleições (CNE) durante prosesu apuramentu nasional hala’o.
Komandante Jerál PNTL Komisariu Polísia Julio da Costa Hornay Kuarta ne’e (26/07) ba jornalista sira hateten objetivu husi kolokasaun seguransa iha edifisiu CNE hodi asegura prosesu apuramentu nasional nian atu bele lao ho diak.
“Komandu PNTL munisipiu hotu sei prontidaun, sei mantein nafatin seguransa metin hodi antisipa karik buat ruma mosu, maibé ita hotu-hotu fiar katak sei la mosu tanba Timor oan matenek ona no Timor oan nia matrunidade polítiku ita bele dehan kapás tebes”, tenik Komandante Jerál PNTL iha Kuartél Jerál kaikoli Dili.
Komisariu Polísia Julio da Costa Hornay subliña liu tan katak durante prosesu kampaña fulan ida laiha buat ida, prosesu eleisaun lao diak, kontajen votu iha sentru votasaun la mosu buat ida, apuramentu distrital mós la akontese buat ida, deslokasaun urna husi munisipiu to’o mai nasional la mosu buat ida no agora apuramentu nasional lao dadaun hela , ne’e hotu hatudu sinal ida katak povu Timor matenek ona.
“Agora dadaun PNTL Dili kontinua mantein alerta to’o wainhira iha ona rezultadu husi Tribunal aprova no promulga nune’e to’o formasaun governu”, salienta Komisariu Polísia ne’e.
Media PNTL.
