Dili, grupu Hadomi Paz no Estabilidade ne’ebe kompostu husi individu no instituisaun balun sexta ne’e (11/08) hasoru malu ho Komandante Jerál Polísia Nasional Timor-Leste (PNTL) Komisariu Polísia Julio da Costa Hornay hodi hato’o kongratulasaun ba servisu PNTL nian durante prosesu kampaña no eleisaun Parlamentar tinan 2017.
Representante grupu Hadomi Paz no Estabilidade Luis Sampaio hafoin enkontru hateten inisiativa grupu ida ne’e hodi hasoru malu ho na’In ulun PNTL nian hodi fó hanoin no kongratula ba susesu ne’ebe PNTL halo hodi matein paz no estabilidade iha Timor-Leste.
“Ami mai atu fó hanoin, fó koragem liu-liu mós kongratula susesu PNTL nian, orgaun seguransa no defesa relasiona ho eleisaun ne’ebe maka susesu ona, maibé agora ita iha hela prosesu ida aproximasaun entre polítiku sira atu buka solusaun alternativa saida diak ba futuru governasaun foun mai”, hateten Luis Sampaio.
Aktual Diretór Judicial System Monitoring Programme (JSMP) ne’e subliña liu tan katak grupu ne’e mós mai atu fó forsa hodi husu ba instituisaun seguransa no defesa, liu-liu PNTL atu mantein sira nia profesionalismu, pozisaun no firmeza atu garante seguransa, paz ba ita nia nasaun atu fó oportunidade ba ita nia polítiku sira atu buka dalan ou opsaun diak liu ba formasaun governu foun mai.
Observasaun grupu ne’e halo ba PNTL durante prosesu eleisaun nian, Luis Sampaio esplika,”Em termu eleisaun ninian sira (PNTL) susesu tebes iha eleisaun Prezidensial no Parlamentar ne’ebe ita hotu-hotu tauk no preukupa tanba iha grupu oin-oin no partidu barak maibé PNTL hatudu progresu ne’ebe bo’ot tebes-tebes, hatudu profesionalismu ne’ebe ita dehan luar biasa tanba sira maneja konflitu, sira maneja tentativa ba potensia konflitu sira ne’e ho diak tebes-tebes ikus mai laiha buat ida maske iha insidente kiik oan ruma ne’ebe mosu, maibé sira bele atúa ho diak hodi to’o agora ita hotu sente seguru”.
Enkontru ne’e hala’o entre Komandante Jerál PNTL hamutuk ho membrus husi Grupu Hadomi Paz no Estabilidade hanesan Diretór JSMP Luis Sampaio akompaña husi eis Primeira Dama Isabel Fereira.
Media PNTL.
