Dili, Komandu Polisia Nasional Timor-Leste (PNTL) liu husi Departamentu Rekursu Humanu (DRH) iha kuarta ne’e (27/09) halo lansamentu ba Sistema Base de Dados atu bele aktualiza dadus membru PNTL hotu.
Komandante Jerál PNTL Komisariu Polísia Julio da Costa Hornay ne’ebe ofisialmente lansa Sistema Base de Dados ne’e hateten oportunidade diak Komandu Administrasaun liu husi Departamentu Rekursu Humanu konvida Komandante Munisipiu, Unidade no Departamentu hotu atu halo lansamentu ba Base de Dados Rekursu Humanu PNTL nian.
“Ita hein katak ho base de dados ne’ebe estabelese ona ne’e bele fó vantajen diak ba instituisaun atu bele hatene diak liu tan ninia pesoal ne’ebe ezerse misaun no funsaun nu’udar membru PNTL, tanba tinan hirak liu ba ita iha difikuldade kona-ba dadus ne’ebe iha hanesan muda pesoal ba fatin seluk maibé iha dadus nia naran nafatin iha servisu fatin tuan, buat barak maka ita ultrapasa iha tinan 17 liu ba”, tenik Komandante Jerál PNTL.
Komisariu Polísia Julio da Costa Hornay espera ho estabelesimentu base de dados ida ne’e bele favorese ona andamentu prosesu administrativu PNTL nian liu-liu iha area base de dados PNTL no husu ba DRH atu bele konfirma dadus sira ne’e ho didiak ho Komandante Munisipiu, Komandante Unidade sira atu nune’e membru efetivu 4.009 ne’e ninia dadus kompletu.
Entretantu, Komandante Administrasaun PNTL Superintendente Xefe Mateus Fernandes hafoin serimonia lansamentu hateten durante ne’e PNTL laiha base de dados entaun dadus ne’ebe PNTL iha kuando presija urgente ruma susar atu hetan, nune’e iha tinan barak nia laran hahu’u halo preparasaun atu oinsa nusa bele iha base de dados ida ne’ebe diak.
“Base de dados ne’ebe ohin ita lansa buat barak maka presija kompleta, maibé mínimu ita PNTL iha ona base de dados atu nune’e kuando presija urgente ruma ita hein hasai deit tanba ne’e ho base de dados ne’e ajuda tebes-tebes PNTL para depois bele halo administrasaun no planeamentu ida ne’ebe diak liu tan iha futuru”, informa Komandante Administrasaun PNTL.
Superintendente Xefe Mateus Fernandes haktuir tan katak kuandu PNTL ida gradua husi Centro Formação automatikamente ninia base de dados, base de pesoal tama diretamente ba DRH para depois bele formula iha sistema base de dados ne’ebe lansa ona.
Diretór DRH PNTL Superintendente Asistente Lucas Tilman relata husi sistema ne’ebe maka instala ona, PNTL akumula nia membru efetivu hamutuk 4.009 ne’ebe kompostu husi Unidade, Departamentu no PNTL munisipiu 13.
Iha biban serimonia ne’e, fahe mós sertifikadu ba membru PNTL inklui funsionariu sivil hamutuk na’in 9 ne’ebe maka partisipa ona iha treinamentu operador ba sistema Data Base. Partisipa iha serimonia ne’e Komandante Jerál, Segundu Komandante Jerál PNTL, Komandante PNTL Munisipiu, Unidade no Departamentu hamutuk ho funsionariu sivil PNTL nian.
Media PNTL.
