Dil, Ministeriu Solidaridade Sosial liu husi diresaun Nasional Seguransa Sosial Halo Sosializasaun ba Dekretu Lei No. 12/2016 (14 Novembro) kona-ba Rejime Kontributivu Seguransa Sosial ba Komandante Munisipiu, Unidade, Centro Formação Polícia no Departamentu sira iha Polísia Nasional Timor-Leste (PNTL).
Segundu Komandante Jerál PNTL Komisariu Polísia Faustino da Costa iha abertura ba Sosializasaun ne’e hateten PNTL desde hari’I iha base de dadus ida, husi base de dadus ida ne’e ho progresu desenvolvimentu ne’ebe lao PNTL deteta dadus ida ne’e presija hadia diak liu tan.
“Iha semana hirak liu ba ita halo lansamentu base de dadus PNTL ninian ida foun, ho lansamentu ida ne’e hau hanoin ita bo’ot sira hatene tanba saida maka ita presija halo, tanba ajente funsaun públika funsionariu estadu nian ida sempre iha obrigasaun no mós iha direitu; direitu ba funsionariu ajente estadu nian hotu regras saida deit maka atu atribui ba ema sira ne’e”, tenik Segundu Komandante Jerál PNTL.
Komisariu Polísia Faustino da Costa salienta liu tan katak iha Timor-Leste kuando ita hare’e didiak ema ne’ebe ho idade produktivu laos númeru ida ne’ebe ki’ik inklui instituisaun ida ne’e rasik, ajente funsaun públika funsionariu estadu nian ne’ebe ho idade 60 laos oituan, nune’e mós menus husi idade 60 laos oituan maibé barak maka sira nia kondisaun saúde la permite hodi halo servisu.
“Iha tinan 2012 ita iha resulasaun rua ne’ebe define kona-ba saida maka invalidés no saida maka validés, nune’e ita hare’e didiak bele halo ita nia aplikasaun no implementasaun maibé iha razaun barak mós tanba ne’e dalaruma atu implementa mós parte benefisiariu balun sente deskontente, balun kontente tanba ne’e maka iha tinan 2016 liu ba ita nia governu kria dekretu Lei No. 12/2016”, hatutan Komisariu Polísia ne’e.
Iha fatin hanesan Diretora Diresaun Nasional Seguransa Sosial- Ministeriu Solidaridade Sosial hateten depois Independensia ita iha Lei inan ne’ebe koalia kona-ba Sidadaun nia direitu ba Asistensia no Seguransa Sosial, kuandu estadu ne’e hahu’u, hahu’u ho parte ida naran Asistensia Sosial iha ne’ebe estadu maka prêve buat hotu-hotu ho kondisaun katak liu husi asesmentu ida, avaliasaun profunda ida katak ema ne’ebe maka bele simu ne’e, ema ne’ebe maka iha duni direitu atu simu tanba nia laiha buat seluk.
Sosializasaun ne’e hala’o iha tersa ne’e (17/10) iha Salaun enkontru Kuartél Jerál PNTL no partisipa husi Komandante PNTL Munisipiu Unidade, Centro Formação Polícia no Departamentu sira ne’ebe tutela iha PNTL.
Media PNTL.
