Dili, Komandu Polísia Nasional Timor-Leste (PNTL) liu husi Komandante Jerál akompaña ho Segundu Komandante Jerál PNTL kinta ne’e (23/11) hala’o enkontru semanal ho Presidente Repúblika (PR) hodi hato’o situasaun seguransa iha teritoriu laran tomak.
Komandante Jerál PNTL Komisariu Polísia Julio da Costa Hornay hafoin enkontru ba jornalista sira hateten enkontru refere hanesan enkontru semanal ne’ebe Komandu halo hodi hato’o informasaun kona-ba situasaun seguransa no mós situasaun asidentes, insidentes, tráfiku ne’ebe akontese iha periodu semana rua liu ba no mós servisu seguransa PNTL ninian.
“Ami PNTL nia misaun klaru iha Konstituisaun da Repúblika, iha Lei Organika PNTL, iha regulamentu disiplinar kona-ba deveres sira ne’ebe maka PNTL sei ezerse, ami mantein no firmeza ba ami nia misaun, ami prontu atu asegura estabilidade no paz iha rai laran, kestaun politika ami la mete ida ne’e, kestaun politika ne’e politiku sira nian, maun bo’ot sira hatene oinsa atu rezolve kestaun politika iha rai laran”, hateten Komandante Jerál PNTL ne’e.
Komisariu Polísia Julio da Costa Hornay salienta liu tan katak forsa seguransa ninia misaun atu halo seguransa, laos atu halo politika ne’ebe kualkér situasaun ne’ebe maka akontese iha teritoriu Timor-Leste laran tomak, forsa seguransa en-koordenada ho forsa Defesa Timor-Leste prontidaun atu atúa no halo prevensaun wainhira mosu problema.
“Maneira prevensaun maka ita halo aktividades patrullamentu lao ain no aktividade patrullamentu ho kareta, halo sosializasaun liu husi Ofisial Polísia Suku (OPS) sira nia servisu iha suku, eskuadra mai fali iha munisipiu sira ne’ebe ita lao nafatin, atu halo prevensaun ba seguransa, informasaun detallu ba ita nia povu, maibé karik iha konfrontus ruma ou problema ruma mosu ami tenke atúa tanba ne’e misaun ami nia, ami prontidaun ba ida ne’e”, hatutan Komisariu Polísia ne’e.
Hatan kona-ba kazu membru PNTL tiru joven ida iha area Pantai Kelapa foin lalais, Komandante Jerál PNTL esplika, “Los duni iha Pantai Kelapa membru polísia ne’ebe halo atuasaun ida ne’e, atu asegura Ita nia entidade governu nian ne’ebe hasoru situasaun ida ne’ebe presija atuasaun membru sira ne’ebe hamutuk ho nia (entidade governu-red) no prosesu kriminal lao tiha ona, lori ona ba tribunal liu husi Ministeriu Públiku depois ita hare’e ninia rezultadu oinsa”.
Komisariu Polísia Julio da Costa Hornay subliña liu tan katak normalmente membru PNTL ida lao ho entidade ida maka entidade ne’e hetan ameasa, nia (membru PNTL-red) tenke halo atuasaun tanba nia misaun maka ne’e atu asegura entidade ne’ebe sira koloka ba atu asegura.
“Agora kestaun sala ou la sala, lao tuir prosedur ou lae, Lei iha atu bele deside dehan katak ajente ne’e sala ou lae, instituisaun mós hare’e ida ne’e, ami laos dehan katak membru ida ne’e sala ou lae ami labele koalia ida ne’e tanba prosedimentu legais sira maka iha ne’eba tiha ona no nia (membru PNTL-red) hala’o nia misaun kuandu entidade ne’ebe lao ho nia (membru PNTL-red) atu asegura hetan ameasa ou iha situasaun ne’ebe presija atuasaun membru sira nia”, esplika Komisariu Polísia ne’e.
Media PNTL.
