Dili- Xefe suku nain 25 ne’ebe maka tuir Kursu de Defesa e Seguransa Nasional iha Institutu Defeza nasional (IDN) halo vizita estudu mai Kuartel Jeral Polisia Nasional Timor-leste (PNTL) hodi hare no rona lalaok servisu instituisaun seguransa ne’e.
Koodenador Kursu de Defesa e Seguransa Nasional Nuno Corvelho Sarmento hateten ami lori sira mai iha ne’e atu bele hatene sistema no kunese ambiente servisu PNTL nian nune’e bele halo komunikasaun ida nebe diak ho autoridade relevantes hodi hala’o sira nia knar nune’e autoridade local sira ne’e involve maximu iha servisu seguransa nian Nia hato’o asuntu ne’e ba Media PNTL iha Kuartel Jeral kaikoli Dili, Sexta (17/05).
Nia haktuirtan kursu ne’e importante tebes atu kapasita Xefe suku sira nune’e bele aumenta sira nia konesimentu iha area oin-oin no kria ambiente nebe diak ho entidade hotu iha ligasaun ho poder lokal.
Pograma formasaun ne’e halao durante loron lima (5) foka liu konaba materia Defeza e Seguransa Nasional, Sidadania, Poder Lokal Estadu no ambiente ho protesaun sivil.
Iha vizita mai Kuartel Jeral ne’e Seksaun Sistema Jestaun insidente (SJI) halo aprezentasaun konaba oinsa rekola informasaun no rejista insidente no asidente ne’ebe maka akontese iha teritoriu timor laran tomak.
Kursu de Defesa e Seguransa Nasional ne’e halao ba Xefe suku hotu hamutuk nain 452 kada turma Xefe do suku nain 25 maka partisipa, agora tama ba segundu turma no semana oin mai ho turma terseru.
Formador ba kursu ne’e timor oan sira ho espesialidade oi-oin, balun dosente nomos balun espesialidade iha area defesa seguransa nian. Media PNTL
