Dili, Komandu Polísia Nasional Timor-Leste (PNTL) segunda-feira (27/05) ne’e asina Memorandum of Understanding (MoU) ho International Committee of The Red Cross (ICRC) ka Cruz Vermelha Internasional atu instituisaun rua ne’e bele servisu hamutuk diak liu tan hodi atende komunidade sira iha tempu emergensia no halo mós workshop ho tema “Dezeminasaun Kona-ba Regra & Estandarte Internasional Polisiamentu nian Ba Ofisias Superior PNTL”.
Segundu Komandante Jerál PNTL Komisariu Polísia Mateus Fernandes hafoin serimonia ne’ebe hala’o iha salaun Jl.Villa Fatuhada ba jornalista sira hateten objetivu husi asinatura ne’e atu oinsa maka instituisaun rua ne’e bele servisu hamutuk diak liu tan no ICRC sei fornese treinamentu nesesariu balun ba PNTL atu mellora diak liu tan kapasidade polísia nian ne’ebe iha.
“Treinamentu ne’ebe maka ICRC sei fornese ba PNTL ho objetivu ida atu mellora diak liu tan kapasidade polísia nian ne’ebe iha hodi bele koopera hamutuk iha kualker situasaun kuandu situasaun nesesita”, tenik adjuntu Komandante Jerál ne’e.
Entretantu, Xefe ba Misaun Cruz Vermelha nian iha Timor-Leste João Martins Alves hateten ICRC ou bain-bain ema dehan Cruz Vermelha Internasional ninia aktividade basea liu ba mandatu ne’ebe fó husi Konvensaun Geneve hanesan organizasaun humanitariu internasional no ICRC nia mandatu iha parte rua maka hanesan iha tempu konflitu no iha tempu dame no iha aktividade ne’ebe oin-oin, ita bele halo konkluzasaun katak iha aktividade protesaun, prevensaun, kooperasaun no iha aktividade reunifikasaun familia.
“Agora dadaun ita tama ba faze prevensaun ne’ebe importante tebes-tebes, ICRC halo aktividade hamutuk ho PNTL rasik no halo mós ho Falintil Forsa Defesa Timor-Leste (F-FDTL) no Akademi sira liu husi Universaidade sira iha Timor-Leste no mós ho Media sira no ho buat sira ne’e hotu ami mós presiza atu hakbesik ba autoridade sira atu oinsa bele habelar ka fahe informasaun, kona-ba informasaun ne’ebe ICRC fahe la dok husi sira nia responsabilidade no sira kna’ar”, hateten Xefe ba Misaun Cruz Vermelha ne’e.
João Martins akresenta liu tan katak antes tama ba sesaun dezeminasaun informasaun ohin halo mós Nota Entendimentu ida entre ICRC ho PNTL ba durasaun tinan ida atu hare’e liu-liu ba kapasitasaun ne’e maka ita sei fó dezeminasaun ba Komandante sira no mós instructor sira no ba mós iha primeiru Socorro (Pertolongan Pertama) no ita halo mós briefing/ fahe informasaun ba Ofisias Polísia sira ne’ebe maka atu preparasaun hodi destaka ba iha Forsa Dame nian (Peace Keeping) inklui mós sira ne’ebe ita bolu rekruta foun, tanba wainhira sira tama ladun koñese entaun iha akordu ida ne’e ICRC iha oportunidade hakarak atu fahe informasaun kona-ba mandatu no servisu Cruz Vermelha Timor-Leste no mós Cruz Vermelha Internasional nian.
MoU ne’e asina husi Segundu Komandante Jerál PNTL Komisariu Polísia Mateus Fernandes ho Deputy Head of Regional (Delegasaun ICRC ba Indonesia no Timor-Leste) Dany Merhy no workshop ne’e hetan partisipasaun másimu husi Komandante PNTL munisipiu 12 inklui RAEOA no Komandante Unidade no Departamentu sira iha PNTL.
Media PNTL.
