Dili, Komandu Polísia Nasional Timor-Leste (PNTL) kinta-feira (13/06) ne’e hetan vizita estudu husi Xefe Suku hamutuk na’in 22 ne’ebe maka frekuenta hela Kursu Defesa no Seguransa iha Instituto Defesa Nacional (IDN).
Dirétur Rekursu Humanu PNTL Superintendente Assistente Emilio dos Santos iha entrevista hateten Komandante Jerál PNTL iha loron hirak liu ba simu karta ida husi dirétur IDN atu informa kona-ba Kursu Seguransa Defesa Nasional ba Xefe Suku sira, Kursu ne’e hahu’u iha fulan hirak liu ba.
“Iha kursu ida ne’e, sira mós iha programa ida bolu dehan Vizita Estudu, iha vizita estudu ne’e sira foka ba fatin tolu hanesan ida mai PNTL, Falintil Forsa Defesa Timor-Leste (F-FDTL) no ida ba Protesaun Sivil ou Bombeiros, iha parte PNTL sira atu hare’e fatin rua importante maka hanesan ida sira atu hare’e kona-ba Sistema Rekrutamentu no ida seluk sira atu hare’e kona-ba oinsa maka PNTL ninia sistema kona-ba rekolla dadus krime ne’ebe maka akontese iha teritoriu nasional”, tenik Dirétur Rekursu Humanu ne’e.
Superintendente Assistente Emilio hatutan tan katak iha tempu vizita estudu ne’e parte IMS (Sistema Jestaun Insidente) PNTL nian halo aprezentasaun kona-ba Insidente Jestaun Krime nian atu nune’e sira mós bele intende katak xefe suku sira hamutuk ho ita nia Ofisial Polísia Suku (OPS) sira iha terenu tanba kualker asidente ne’ebe akontese kuandu polísia rezista ona bele hatama ona iha sistema IMS ninian maka automatikamente sistema ne’e rezista iha PNTL hotu.
“Sistema rekrutamentu iha primeira vizita hau lori sira ba Centro Formação Polícia (CFP) atu hare’e kona-ba sistema ne’ebe maka ita instala ona iha CFP, partikularmente kona-ba meius sira ne’ebe ita uza ezemplu hanesan ita halo test kona-ba psico-test no teste ba fisika atu nune’e xefe suku sira mós bele kanaliza informasaun ne’ebe sira hetan ba iha juventude sira ne’ebe maka iha interese atu sai polísia”, hatutan Superintendente Assistente ne’e.
Iha fatin hanesan, Nuno Cornelio Sarmento hanesan koodenador ba Kursu ida ne’e hafoin vizita ba Media PNTL hateten vizita ne’e hanesan parte programa kursu IDN realiza ba Xefe Suku sira tanba Seguransa no Defesa Nasional no programa ne’e iha vizita mai PNTL no bombeiros.
“Objetivu husi vizita ida ne’e atu bele kria ambiente proximidade ida entre xefe suku no polísia, premite mós sira atu hare’e realidade saida maka instituisaun polísia ne’e hala’o to’o iha ne’ebe no husi ne’e bele hametin liu tan konfiansa ba sira, sira mos iha biban vizita ne’e bele aprezenta mós preukupaaun ne’ebe sira iha, sugestaun atu nune’e bele fasilita kontaktu ho PNTL”, tenik koodenador ne’e.
Nuno Cornelio Sarmento akresenta liu tan katak iha faze vizita estudu ne’e xefe suku hamutuk na’in 22 maka hetan oportunidade dahuluk hodi mai Kuartél Jerál PNTL no Kursu refere sei kobre ba xefe suku iha teritoriu hotu ne’ebe hamutuk na’in 452. Kursu ba faze dahuluk ne’e, xefe suku hamutuk 250 no tuir mai sei kompleta hotu xefe suku sira iha teritoriu hotu. Xefe suku na’in 250 ne’ebe partisipa faze primeiru kursu nian, na’in 22 mak mai iha vizita no sira seluk sei mai iha faze tuir mai.
Media PNTL.
