Dili- Polisia Nasional Timor-Leste (PNTL) halo Doasaun Ran ba Banco Nacional de Sangue (BNS) atu nune’e bele tulun ema moras hirak ne’ebe maka presija transfusaun ran.
Komandante Jeral PNTL Komisariu Faustino da Costa hateten Komandu PNTL iha kontaktu ho HNGV inklui pasiente balu iha ospital ne’ebe presija tebes ran tanba ne’e PNTL nudar instituisaun ida ne’ebe ho nia membru barak ita sempre suporta apoiu bainhira HNGV presija ran, Nia hato’o asuntu ne’e liu husi deskursu iha Kuartel Jeral PNTL Kaikoli Dili, Sexta (13/09).
Komisariu ne’e haktuirtan hare mos situasaun ida ne’e oportunu ohin ita uza para alende PNTL prepara atu selebra tinan 20 misaun INTERFET mai Timor-Leste, forsa sira ne’ebe 1999 tama ita nia rain sira hasoru risku ida oinsa atu defende ema seluk nia moris liu-liu timor oan sira tanba ne’e hela loron hitu (7) ita atu selebra loron inportante no istoriku ida ne’e ohin PNTL voluntariamente fo ran utuan atu suporta ospital nune’e bele fasilita komunidade no famila sira ne’ebe agora ba oin presija ran.
“Ba membru PNTL hotu atu hare moto ida “Ran Turuk Ida Bele Salva Ema Ida nia Vida” entaun desde ke ita sei bele fo ita aproveta para bele salva ema seluk nia vida tanba knaar no responsabilidade membrus instituisaun ida ne’e nian maka atu proteje no salva ema inklui ema nia vida no ema hotu nia sasan,” dehan Komandante Jeral.
Atividade ida ohin refleta teb-tebes ba misaun, knaar no responsabilidade membru PNTL nian tanba ne’e enkoraja imi no sira seluk atu atividade no eventu ida ne’e laos ho serimonia ofisial hanesan ne’e mak ita halao maibe ita boot sira bele kordena ho klinika PNTL atu kontaktu HNGV para ita bele apoiu tuir buat ne’ebe ita iha.
Iha okajiaun ne’e Reprejentante Diretur Jeral Hospital Nasional Guido Valadares (HNGV) Dr. Mendes Pinto hateten HNGV hakarak agradese no apresia ba Komandante Jeral PNTL ne’ebe ho ideia diak halo asaun solidaridade hodi fo netik ran utuan para bele ajuda maluk sira ne’ebe moras no presija ran.
Nia informatan desde uluk iha governu tranzisaun PNTL sempre ajuda fo doasaun ran ba HNGV tanba ne’e ita agradese ba solidaridade ida ne’e.
Programa doasaun ran ne’e partisipa husi Medicus no para medikus husi Banco de Sangue Ospital Nacional, Inspetor Jeral PNTL, Komandante do Komandu Operasaun, Xefe Departamentu, Xefe Gabinete, reprezentante Unidade sira, Ofisial Ligasaun PNTL no F-FDTL ne’ebe servisu iha Sentru Komandu Kontrolu no Kordenasaun, Ofisiais, Sarjentu no Ajente sira. Media PNTL
