Dili, Komandu Polísia Nasional Timor-Leste (PNTL) liu husi Komandu Administrasaun hamutuk ho parseiru United Nations Development Program (UNDP) kinta ne’e (19/09) hala’o sorumutu ida hodi sosializa Sistema Jestaun Dashboard PNTL ba Komandante Munisipiu no Diretur Departamentu sira.
Reprezentante Komandante Jerál em substituisaun Inspector Geral Superintendente Xefe Carlos Jerónimo iha ninia intervensaun ba sorumutu ne’ebe hala’o iha salaun enkontru Kuartél Jerál koalia katak esforsu tomak ne’ebe maka durante tempu ida ne’e desenvolve husi UNDP ho forma ida atu oinsa ita bele iha duni sistema ida diak.
“Tanba ne’e mak ita nia Komandante Jerál anteriormente sei hanesan Inpector Jerál iha vizita ida ba nasaun Malaysia no iha ne’eba hatudu entaun ho hanoin ida ne’e sente katak presiza mós desenvolve sistema ida ne’e iha instituisaun PNTL”, tenik Inspector Geral ne’e.
Superintendente Xefe esplika liu katak ida ne’e importante tebes no husu ba Komandante sira atu atende didiak sistema Dashboard, katak sistema ida ne’ebe halo hodi integrasaun ba dadus ho mós IMS, nia sistema ida deit bele responde servisu barak Komandante sira nian nune’e mós hamenus ona surat-tahan sira ne’e, tanba dadus tomak iha hotu sistema Dashboard ne’e nia laran. Iha sistema ne’e mós ne’e organiza oinsa ita bele halo jestaun frotas liu-liu kona-ba lojistik, ita hatene ona kareta saida deit tama mai, sá tinan, iha tempu ida ne’e att iha parte saida no ita troka nia saida.
Entretantu, reprezentante UNDP Ms. Tuya Altangerel iha sorumutu ne’e hateten UNDP kongratula servisu PNTL nian tanba matein paz no seguransa iha tinan 20 ikus ne’e katak iha tinan 20 ikus ne’e ho ita bo’ot sira nia apoiu nasaun atinzi no alkansa servisu desenvolvimentu barak.
“Ami privelejiu tebes katak atu servisu hamutuk ho PNTL katak sistema Dashboard ne’e hahu’u desenvolve iha tinan 2015, iha tempu ne’eba UNDP servisu hamutuk ho PNTL ita nia Komandante Jerál anteriormente sei hanesan Inpector Jerál iha misaun ida ba hare’e sistema Dashboard polísia Malaysia nian, hare’e ba idea hirak ne’ebe iha maka UNDP ho PNTL seksaun IT desenvolve Dashboard ida ba PNTL”, tenik reprezentante UNDP.
Ms. Tuya esplika tan sistema Dashboard ne’e hanesan portal ida bele mós hanesan data base ida bele vizualiza kualker informasaun PNTL nian tomak ba iha ne’eba. Agora PNTL iha sistema ida ne’e maka parte MTO, Rekursu Umanu, IMS no Komandante sira bele ba hare’e hotu iha sistema ida ne’e nia laran.
Partisipa iha sorumutu ne’e Inspector Geral, Komandante Komandu Administrasaun, Komandante Rekursu Umanu, Komandante Planeamentu, Komandante PNTL munisipiu, Unidade no Departamentu sira iha PNTL.
Media PNTL.
