Dili- Primeiru Sarjentu Orlando Alves reforma husi nia kargu nudar membru Polisia Nasional Timor-Leste hafoin halao knaar durante tinan 18 nia laran iha instituisaun seguransa ne’e.
Komandante Jeral PNTL Komisariu Faustino da Costa hateten ohin loron 13 fulan Dezembru tinan 2019 marka istoria foun iha Komandu Jeral PNTL, hodi realija primeira vez serimonia aprezentasaun Reforma Voluntariu ba Primeiru Sarjentu Orlando Alves ho Numeru Identidade Pessoal (NIP) 10972.
Komisariu ne’e haktuirtan iha data 11/04/2019 Primeiru Sarjentu Orlando Alves, hatama pedidu reforma ba iha Institutu Nasional Seguransa Sosial no hetan aprova ho desijaun administrativa ho numeru SSV00729/XI/2019 katak Primeiru Sarjentu Orlando Alves atribui ba pensaun velhice.
Ohin loron ita realija serimonia ida ne’e hodi hakotu prestasaun servisu Primeiru Sarjentu Orlando Alves iha instituisaun PNTL, “Komandu sente triste tanba nia presta servisu durante tinan 18 (2001 to’o 2019) ho dedikasaun tomak nune’e Komandu agradese ba nia kontribuisaun durante iha Instituisaun PNTL,” dehan Komisariu Faustino.
Iha okajiaun ne’e Primeiru Sarjentu Reformadu Orlando Alves hateten Hau husu reforma tanba rajaun saude nomos nesesidade partikular ne’ebe presija atu trata, nudar oan mane mesak ne’ebe maka inan aman mate ona hau presija fila ba rai moris fatin hodi rejolve asuntu balu no hare kintal ne’ebe maka husik hela.
Mensajen ba kolega no alin joven sira katak buat ne’ebe maka durante ne’e hau halo diak imi bele banati tuir no ladiak karik hau husu deskulpa tanba nudar ema kriatura la ses husi sala.
Primeiru Sarjentu reformadu Orlando Alves desde tinan 2012 halao knar iha departamentu Klinika no Saude PNTL nudar Infermeru.
Serimonia aprezentasaun Reforma Voluntariu ne’e kompleta ho entrega Sertifikadu de Louvor husi Komandante Jeral PNTL ba Primeiru Sarjentu Reformadu no Reformadu simbolikamente entrega farda ne’ebe maka durante ne’e nia uja hodi halao servisu.
Serimonia ne’e prezidi husi Komandante Jeral akompaña husi Segundu Komandante Jeral Komisariu Mateus Fernandes no partisipa husi Komandante du Komandu Administrasaun, Diretor Rekursu Humanus, Inspector Jeral, Xefe Unidade Servisu Investigasaun Kriminal, Komandante Unidade, Xefe Servisu, Ofisiais Superior, no familia reformadu. Media PNTL
