Kuarta Loron 22, fulan Janeiru tinan 2020, Ministru Interior Interinu DR. Filomeno da Paixão de Jesus, Akompaña husi Jenerál Lere Anan Timur, Komisariu Polísia Faustino da Costa realiza enkontru ho Prezidente da República Francisco Guterres Lú Olo, iha Palasiu Prezidente Bairu-Pite Dili.
Enkontru refere hanesan enkontru semanál ne’ebé hala’o ho Prezidente da Repúblika hodi koa’lia kona-ba situasaun Siguransa Nasionál iha Teritoriu Timor-Leste nian. Alende ne’e sei iha mós setenta dias Prezidente da República sei bolu lider Polítiku sira hotu atu tu’ur hamutuk, liu-liu lider rezisténsia sira ne’ebé iha influénsia iha Timor-Leste atu bele hetan konsensu nasionál ida para bele forma fali governu foun ou atu hetan solusaun ida ba iha situasaun impase polítika ne’ebé mosu iha ita-nia nasaun. “Ohin Prezidente bolu Ministru Defeza no Ministru Interior Interinu mai para atu halo preparasaun durante periodu ida-ne’e oinsa atu reforsa no asegura liutan siguransa rai laran, Brigadeiru jeneral F-FDTL reformadu ne’e.
Tuir Ministru Interior Interinu situasaun agora la’o normál no laiha buat ida, situasaun nafatin deit, prezidente bolu ha’u atu fó nafatin atensaun, enkuantu Prezidente dezenvolve serbisu diálogu entre lider sira, tanba ne’e maka husu ami-nia parte atu hasai polítika deretiva foun ne’ebé koa’lia kona-ba konjuntu ba komandu rua, hodi kordenadu halo seguransa ba iha kapitál Dili, importante liu situasaun ida ne’ebé konduzivu nune’e diálogu nasionál ne’e bele la’o ho diak.
Iha fatin hanesan, Ministru Interior Internu apela ba komandu rua tenke metin, komandante ida deit laiha komandante rua tantu iha PNTL no mós F-FDTL, husu mós ba populasaun sira, aman inan no foin-sae sira liu-liu joven sira, apelu governu nia maka ne’e, ita mantein ita-nia aktividade lor-loron ho normalidade laiha buat ida. Agora ba oin seguransa iha luron sira sei reforsa liutan iha territoriu tomak, ita labele kria fali situasaun ida la konduzivu, ita hotu ajuda para situasaun ne’e la’o di’ak nune’e ita-nia nai ulun sira bele hetan konsensu ida, fiar katak ita sei hetan.
Fontes Media-MI.
