Dili, Kazu membru Polísia Nasional Timor-Leste (PNTL) ne’ebe baku joven ida iha postu administrarivu Atabae munisipiu Bobonaro ne’ebe akontese iha semana kotuk, submete ona ba prosesu investigasaun. Kronologia husi akontesimentu ne’e maka iha loron sabado 04 fulan Jullu tinan ne’e mais ou menus iha oras tuku 12 meudia iha ne’ebe akontese asaltu malu entre grupu rua ne’ebe maka akontese iha Gisu postu administrativu Maubara munisipiu Liquiça.
Porta voz Komandu PNTL Superintendente Xefe Arnaldo de Jesus Almeida D.C. Araújo liu husi konferensia imprensa ne’ebe hala’o iha kuarta-feira (08/07) ne’e iha salaun enkontru haktuir tan kronologia husi akontesimentu ne’e katak iha asaltu entre grupu rua ne’e rezulta vitima ida kanek.
“Iha momentu ne’eba membru/ajente polísia ho inisial F.S iha duni fatin akontesimentu no nia halo atuasaun imediatamente hodi lori suspeitu husi konfrontu ne’e ba iha eskuadra PNTL Atabae hodi bele foti ninia deklarasaun, entaun iha momentu ne’ebe membru ne’e halo atuasaun ida ne’ebe maka la tuir regras disiplina PNTL nian”, haktuir Porta voz Komandu PNTL ne’e.
Superintendente Xefe Arnaldo hatutan tan membru PNTL refere fó razaun tanba saida maka mosu agresaun fíziku hasoru suspeitu husi konfrontu ne’e katak, nia (Membru PNTL-red) duni ema ho insial Y.A (Suspeitu-red) ne’e no nia kolen hodi emosional maka nia halo asaun ida ne’ebe la tuir Lei haruka. No nia rasik maka halo video ne’ebe maka to’o ikus viral iha Media Sosial.
“Oras ne’e dadaun membru refere submete ona ba iha prosesu investigasaun disiplinar iha Komandu PNTL Maliana no husu ba vitima ne’ebe maka hetan agresaun físiku husi membru PNTL ne’e atu bele fó informasaun ne’ebe los, koopera ho didiak atu nune’e membru refere bele prosesa tuir Lei ne’ebe maka iha; andamentu ba prosesu ne’e agora dadaun lao hela no ita hein katak iha tempu badak prosesu ne’e sei lori ba tribunal sé karik membru ne’e komete krime no ita hotu hein rezultadu husi prosesu investigasaun ne’e”, tenik Xefe Gabinete Relasaun Públika ne’e.
Iha sorin seluk, Segundu Komandante Jerál PNTL Komisariu Polísia Mateus Fernandes mós kondena ba aktu ne’ebe maka halo husi membru PNTL ne’e. Tuir Komisariu ne’e aktu refere kontra regras disiplinar Instituisaun PNTL nian, wainhira iha investigasaun maka hetan motivu ruma husi aktu ne’e nia (Membru PNTL-red) tenke simu konsekuensia ne’ebe hateten iha Lei Disiplinar PNTL nian.
“Iha prosesu investigasaun maka sei denunsia/informa buat ne’ebe lolos husi motivu agresaun ne’ebe maka membru refere halo ba joven ne’e”, hateten Segundu Komandante Jerál PNTL iha Centro Formação Polícia Dili, ohin (08/07).
Media PNTL.
