Dili, Grupu Movimentu Justisa Ba Dame iha kinta-feira (16/07) ne’e hasoru malu ho Komandu Polísia Nasional Timor-Leste hodi hato’o grupu nia objetivu kona-ba Petisaun ne’ebe maka sira sei hato’o ba Prezidente Repúblika Francisco Guterres “Lu-Olo” relasiona ho situasaun politika rai laran. Grupu refere lidera husi Lider Resistensia António Aitahan Matak hamutuk ho Veteranu balun.
Porta-Voz Komando PNTL Superintendente Xefe Arnaldo de Araujo ba jornalista sira hafoin sorumutu hateten obrigasaun Polísia nian hodi konvida grupu ne’e nian hodi sira bele hato’o sira nia objetivu mai PNTL kona-ba saida maka sira sei hala’o.
“Iha enkontru ne’e ami aserta buat balun kona-ba aktividade balun ne’ebe maka sira sei halo iha tempu oin mai tanba buat hotu tenke aserta ho PNTL hodi bele hare’e ba estabilidade iha rai laran hodi labele mosu dezentidimentu entre sira ho ema balun ne’ebe hakarak destroi”, tenik Porta-Voz PNTL ne’e.
Superintendente Xefe Arnaldo haktuir tan kona-ba aktividade refere hetan autorizasaun husi parte PNTL ka lae ne’e sei termina iha enkontru tuir mai tanba buat hotu sei hare’e fila fali ba Konstituisaun Artigu 42 fó dalan maibé buat hotu labele se’es husi koridor Konstituisaun nian.
“Parte PNTL hein, bainhira mak parte Movimentu nian mai hasoru hodi bele hetan autorizasaun ba Petisaun ne’ebe mak sira sei aprezenta ba Xefe Estadu hodi parte PNTL bele akompaña nafatin hodi bele garante Estrabilidade iha ita nia rai”, hakotu Xefe Gabinete Relasaun Públika PNTL ne’e.
Iha fatin hanesan Lider Resistensia António Aitahan Matak deklara ba media katak informasaun ne’ebe espalla katak Grupu Movimentu Justisa Ba Dame atu halo manifestasaun ne’e lalos, maibé informasaun ne’ebe los maka enkontru ba maluk sira ne’ebe mai husi bairu-bairu hodi halo konsentrasaun iha Sede da Resistensia Bairo Formosa.
“Laos manifestasaun maka atu halo tanba manifestasaun ne’e ema lao ba fatin ne’ebe ami tenke trasa hamutuk ho maluk polisial, seguransa estabilidade tenke forte maka ami halo manifestasaun no ida agora dadaun ne’e bolu konsentrasaun iha Sede hodi bele aprezenta sira nia opiniaun Petisaun, sira la konkorda dezisaun Prezidente nian ne’ebe maka balun los no lalos iha ne’ebe, ami rona sira nia opiniaun maka foin aprezenta kestaun ne’e ba delegasaun hodi lori ba Prezidente RDTL nia gabinete, laos povu maka atu halo asaun fali iha Prezidente nia fatin”, esplika Lider Resistensia ne’e.
António Aitahan Matak akresenta tan delegasaun ne’e ninia porta-voz maka Angela Freitas maibé sei la mosu asaun ruma ne’ebe halo marsa fali iha kapital Dili, buat hotu tenke tuir regras ne’ebe Lei vigora, iha Artigu 42 hateten lolos katak sé mak halo demostrasaun tenke tuir no ema mós ami sei identifika didiak ema sira ne’e foin rona sira nia opiniaun.
“Ami mai iha Komandu PNTL atu bele hetan autorizasaun atu nune’e iha ami nia enkontru ne’e labele mosu instabilidade iha ita nia rai, hodi ami bele hala’o diak aktividade ne’e no konklui ami nia Petisaun atu hato’o ba Xefe Estadu”, haktuir António Aitahan Matak.
Media PNTL.
