COVALIMA, 2 Agostu 2020 (SRP) – Vise-Ministru Interior (VMI), Antonio Armindo hamutuk ho komitiva akompaña direitamente husi Komandante Unidade Patrullamentu Fronteira (UPF), Superintendente Polísia, João Sancho Pires no Komandante PNTL Munisipiu Covalima Superintendente polisia Antonio Maria de Sa, halao vizita ba Postu UPF no Skuadra PNTL (Polisia Nasional Timor-Leste), iha área fronterisa Timor-Leste no Indonezia.
“Vizita ida ne’e sai hanesan oportunidade diak ba hau ho ekipa tekniku aprovizionamentu Ministeriu Interior nian no PNTL hodi haré direitamente fatin ba futuru instalasaun nomos difikuldade sira ne’ebé membru sira hasoru iha terenu. Ita hotu hatene katak, UPF iha fronteirisa dezenpeña papél importante lubuk ida hodi halo kontrolu iha fronteira loron no kalan ba ema no sasán ne’ebe tama ilegalmente mai teritóriu Timor-Leste liu husi “jalan tikus”. Informa Vise-Ministru Antonio ba SRP iha Komando PNTL Munisipiu Covalima (01/08/2020).
Governante ne’e mós hatán ba preokupasaun balun husi komandante postu sira kona-ba negosiante sira ne’ebe kontinua nafatin hasees-an husi selu taxa liu husi dalan lokal maske estabelese ona postu vijilansia sira. Tanba ne’e, tuir planu ba tinan oin sei fokus ba PNTL hodi aumenta tan postu integradu, nune’e aban bairua halo rekrutementu sei hasae numeru ba membru sira ne’ebe servisu iha fronteira.
“Ohin ita rona mos komandante postu sira hato’o no hatudu sira nia preokupasaun konaba falta fasilidade hodi tulun sira halao sira nia servisu loron-loron. Dezafiu bo’ot ida ne’ebé sira hasoru maka Be mos, radio komunikasaun, fardamentu no esensial liu maka Postu ne’ebe at ona no presija alarga tan no halo insatalasun foun ba fatin ne’ebe identifika ona. Realidade iha terenu hatudu katak maske ho difikuldade oin-oin, UPF sira servisu ho diak tebes-tebes hodi hametin nafatin seguransa oras 24 iha liña fronteira terrestre no kria nafatin kooperasaun di’ak ho autoridade seguransa Indonézia nian hodi kontinua alerta no kaptura negosiante sira ne’ebe kontra no viola lei ne’ebe iha ona”. dehan Vise-Ministru Antonio.
Iha okaziaun ne’e, Vise-Ministru ho ekipa mos hala’o vizita ba liña fronteira terrestre Timor-Leste no Indonezia hodi vizita Kompanñia Bravo iha Covalima no prekore Postu UPF sira mak hanesan, Postu UPF Alto Lebos, Postu UPF Fatululik, Postu UPF Fatumea, Postu UPF Belulik Kraik, Postu UPF Aikakar, Postu UPF Walalama, Postu UPF Uamau, Postu UPF Uatumau ne’ebe tuir planu sei halo postu integradu, Postu UPF Foho Lulik, Postu UPF Lolotoe, Komandante Skuadra sira inklui Sefi Sektor no Xefi Posto Migrasaun nian. Tuir planu Vise-Ministru ho ekipa sei vizita mos Kompañia UPF Charlie iha RAEOA iha semana oin.
Fontes: Media MI
