Dili, Komandu Polísia Nasional Timor-Leste (PNTL) orienta ona Komandu Munisipiu Dili (KMD) no Unidade Espesial Polísia (UEP) atu buka meius oinsa maka bele hamate kutun ka aktu sira ne’ebe halo husi bandidu sira iha kapital Dili hodi rezulta kazu krime ikus-ikus ne’e mosu.
Asuntu ne’e hato’o husi Komandante Jerál PNTL Komisariu Polísia Faustino da Costa kinta-feira (06/08) ne’e hafoin hala’o sorumutu semanal ho Prezidente Repúblika (PR) Dr.Francisco Guterres Lu-Olo hodi relata situasaun seguransa no aktividade ne’ebe maka PNTL halo iha teritoriu nasional. Hanesan ita hotu hatene PR dekreta ona Estadu Emergensia (EE), Komandu PNTL sei foku ba parte ne’ebe tuir dekretu governu nian fó atu ezekuta iha EE ida ne’e.
“Situasaun seguransa nivel teritoriu nasional ne’e lao diak maske Dili laran maka sei iha nafatin akontesimentu balun ne’ebe maka PNTL nafatin hala’o hela nia kna’ar atu bele hamate aktu husi ema sira ne’ebe iha tanba ne’e Komandu PNTL orienta ona ba KMD no UEP atu buka meius oinsa maka bandidu sira ne’ebe kria problema iha kapital Dili ne’e tenke hamate ona sira nia kutun, labele kapital ne’e domina fali husi bandidu”, alerta Komandante Jerál PNTL ne’e.
Autoridade másimu seguransa ne’e afirma iha enkontru ho PR aprezenta mós informasaun sira kona-ba akontesimentu ne’ebe akontese iha semana kotuk hanesan kazu hatalik ann katak iha loron balun fulan Agostu nian mosu kazu hatalik ann hamutuk rua iha munisipiu Ermera. Husi kazu rua ne’e, ida familia hato’o ba parte polísia katak vitíma ho moras mental tan ne’e la halo prosesu maibé ida seluk ita halo ona prosesu autopsia no rezultadu entrega ona ba Ministeriu Públiku (MP).
“Asuntu seluk ne’ebe maka aprezenta ba PR maka kona-ba asidente ne’ebe maka sei nafatin ass no asidente ne’e mosu ita detekta primeiru maka hu’un husi problema sira ne’e maka oinsa atu hetan Karta Kondusaun, ohin ba teoria aban ba prátika bainrua lori karreta/motor, tanba laiha formasaun ida própriu katak fulan ou semana hira atu bele koñese sinais, hatene nia responsabilidade hanesan motorista ida ne’e maka sai fátor primeiru kontribui ba ita nia asidente ne’e bo’ot, entaun ita tenta organiza ona katak los duni PNTL parte ida ba solusaun problema maibé mós PNTL laos mesak ba solusaun ba problema sira ne’e”, informa na’in ulun PNTL.
Komisariu Polísia subliña tan PR husu nafatin ba PNTL liu-liu ba asuntu fronteira além-de asegura regras sira EE nian maibé oinsa mós atu hare’e kondisaun membru sira nian iha fronteira. Informasaun kona-ba asidente ne’ebe maka mosu durante fulan Jullu nia laran hamutuk 130 ne’ebe husi númeru ne’e rezulta ema na’in 9 maka mate. Liga ho asuntu iha fronteira katak durante ne’e PNTL kaptura ema ne’ebe tama illegal mai Timor-Leste tantu mós tama ba rai Indonesia hamutuk na’in 149, tanba ne’e PNTL sei nafatin reforsa seguransa iha liña fronteira.
Media PNTL.
