Dili, Komandu Polísia Nasional Timor-Leste (PNTL) tersa-feira (18/08) ne’e hala’o enkontru ida ho parseiru desenvolvimentu Timor-Leste Police Development Program (TLPDP) hodi diskuti koordenasaun programa konjunta ne’ebe maka hala’o ona iha tinan 2019-2020 no estratéjia programa ba tinan 2020-2026.
Segundu Komandante Jerál PNTL Komisariu Polísia Mateus Fernandes iha abertura enkontru ne’e hateten lori Komandu nia naran agradese tebes ba apoiu ne’ebe maka parseiru TLPDP fó durante ne’e mai PNTL tanba prezensa parseiru nian ne’ebe maka sempre hamrik iha PNTL nia sorin iha situasaun saida deit.
“Agora dadaun TLPDP servisu maka’as hela hodi identifika postu haat no lima iha liña fronteira tanba governu ezize postu foun ne’e bele realiza lalais, postu foun sira ne’e sei hare’e liu ba ema sira ne’ebe tama illegal, hare’e ba volume ikus-ikus ne’e ema tama illegal liu husi fronteira sae maka’as, tanba ne’e ita presiza kobre lalais asuntu sira ne’e; entaun governu liu husi Vise Ministru Interior no Komandante Jerál husu TLPDP atu fó apoiu ba ita”, tenik Segundu Komandante Jerál PNTL ne’e.
Komisariu Polísia ne’e haktuir tan parseiru TLPDP iha koragem ne’ebe bo’ot hodi apoiu PNTL liu-liu iha konstrusaun Edifisiu Sentru Koordenasaun Krime Trans Nasional (TNCC-Trans National Crime Coordination Center, sigla Ingês) iha resintu Kuartél Jerál PNTL Kaikoli ne’ebe maka oras ne’e dadaun lao hela.
“Tanba ne’e atu servisu koordenasaun bele lao ho diak presiza ita hotu nia kolaborasaun másimu hodi nune’e ita bele atinzi planu hotu ne’ebe maka ita iha ona, tantu parseiru no mós PNTL rasik”, hakotu Komisariu Polísia ne’e.
Iha enkontru ne’e, parte TLPDP aprezenta programa no apoiu hirak ne’ebe maka sira fó ona ba PNTL iha tinan 2019 to’o 2020 no estratéjia programa sira ne’ebe maka sei kontinua oferese ba PNTL iha periodu tinan 2020 to’o 2026.
Hola parte iha enkontru ne’e Segundu Komandante Jerál PNTL, Komandante Komandu Operasaun, Administrasaun, Xefe Planeamentu, Xefe Jenéru no Segundu Komandante TLPDP ho ekipa.
Media PNTL.
