Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes kinta-feira (07/10) ne’e hala’o enkontru ho Prezidente Repúblika Dr.Francisco Guterres Lu-Olo hodi relata situasaun seguransa iha teritoriu nasional ne’ebe maka lao diak.
Hafoin enkontru Komandante Jerál Komisariu Polísia Faustino da Costa ba jornalista sira heteten enkontru ne’ebe Komandu PNTL halo ho Xefe Estadu ba ohin loron nian tanba kuaze semana hirak maka la konsege hala’o enkontru tanba kestaun seguransa iha liña fronteira no iha enkontru ohin nian maka aktualiza deit atendimentu polísia nian ba kazu ilegais sira ne’ebe maka akontese iha semana hirak ba kotuk.
“Parte terseiru nian maka oinsa PNTL nia preparasaun ba aktividade sira tuir mai liu-liu ita hotu akompaña hanesan aktividade ba eleisaun ninian”, tenik Komandante Jerál PNTL ne’e.
Komisariu Polísia ne’e afirma tan kona-ba postu seguransa ba UPF ne’ebe maka oras ne’e dadaun eziste katak Komandu no governu maka iha konsege iha orsamentu ba iha 2021 atu konstrui postu foun hamutuk hitu (7) agora prosesu ne’e lao hela, maibé iha parte ida ne’e tanba ita hotu iha situasaun Pandemia COVID-19 maka parseiru desenvolvimentu ne’ebe maka apoiu konstrui postu temporariu balun ne’ebe postu sira ne’e hamutuk la inklui ida ne’ebe eziste no permanente maka ita iha 24 postu ne’e mai husi tantu fundu COVID-19 no mós husi parseiru.
Hatan kona-ba membru PNTL ne’ebe maka sei nafatin destaka iha postu entrada kapital Dili nian, hare’e ba dezisaun governu nian ne’ebe maka hakotu ona Serka Sanitaria iha teritoriu nasional, Komisariu Polísia ne’e esplika,”Keta haluha katak situasaun ida laiha ona Serka Sanitaria ka Konfinamentu Domisiliariu maibé Estadu Emergensia (EE) lao, situasaun internal teknikamente atu dehan hanesan ne’e, sé ita retira tiha membru sira husi postu hirak ne’ebe iha oinsa ita bele garante katak fatin sira ita kria ne’e seguru, entaun ami transforma postu entrada iha kapital sai Postu Seguransa Tránzitu atu membru sira iha nafatin”.
Iha enkontru ne’e, mensagem Xefe Estadu nian ba Komandu PNTL maka iha buat rua, primeiru maka ba iha kontinuasaun prosesu travesas ilegais no segundu maka kontinua hala’o servisu tanba agora ita nafatin iha EE. Media PNTL.
