Dili, Vise Ministru Interior (MI) hamutuk ho Komandu Polísia Nasional Timor-Leste (PNTL) sexta-feira (17/12) ne’e inagura Sentru Sela Detensaun Komandu PNTL munisipiu Dili ne’ebe maka suporta husi governu Xina liu husi ninia embaixada iha Timor-Leste.
Vise MI António Armindo hafoin serimonia inagurasaun ba jornalista sira hateten Sentru Detensaun ne’e hetan apoiu husi governu Xina liu husi ninia embaixada ne’e gratuita tanba hare’e ba kondisaun ne’ebe durante ne’e ladun diak ka la favorese atu detein ita nia sidadaun sira iha ne’e ho dignu, entaun tinan kotuk wainhira hau halo vizita mai fatin ida ne’e, hau koalia ho Komandante Jerál no mós Komandante munisipiu atu tau atensaun ba asuntu ida ne’e.
“Nune’e momentu iha fulan Outubru no Novembru wainhira ita hotu preukupa ho Orsamentu iha Parlamentu, ita mós koalia ho ita nia parseiru desenvolvimentu sira hanesan embaixada Xina ho embaixada sira seluk, entaun ita hetan resposta pozitivu husi governu Xina liu husi sira nia embaixada iha Timor, konstrui no ohin halo lansamentu hodi entrega ba governu Timor-Leste atu nune’e ita nia instituisaun PNTL bele utiliza”, tenik Vise MI ne’e.
Membru governu ne’e esplika kona-ba apoiu hirak ne’ebe maka durante ne’e ba PNTL dala barak mai husi doador sira, katak governu iha atu halo desenvolvimentu sira ne’e, maibé laos signifika governu halo buat hotu-hotu, governu halo basea ba Orsamentu tanba ne’e balun ita prevê no balun ita husu apoiu doador sira atu kompleta malu, ida ne’e maka objetivu husi doador sira presensa iha Timor ne’e, ba buat ne’ebe ita bele halo, ita halo maibé ba buat ne’ebe ita labele halo, ita husu ajuda.
Iha fatin hanesan Komandante Jerál PNTL Komisariu Polísia Faustino da Costa hateten primeiru, Sela ne’e hanesan fatin atu asegura ema ho seguru, durante ne’e PNTL iha regra kona-ba utiliza Sela ida ne’e hahu’u husi tempu ONU nian tanba ne’e agora ba oin ita mós iha hela faze ida halo hela revizaun ba norma ne’e oinsa atu utiliza.
“Segundu maka fatin foun, karik ita nia neon mós tenke muda sá tan agora ita iha tempu Adventu katak hafoun ita nia fuan hanesan hafoun mós ho ita nia ann ho servisu, ne’e mensagem simples no terseiru maka uza ho kuidadu no responsabilidade tanba ita hatene katak fatin ne’e laos PNTL maka atu utiliza maibé ne’e ba públiku maka atu sei utiliza, entaun parte PNTL oinsa maka atu asegura fatin ne’e ho diak atu bele utiliza ba tempu naruk”, hateten Komandante Jerál PNTL ne’e.
Komisariu Polísia ne’e afirma tan katak agradese tanba bele hetan apoiu ida ne’e, fiar mós katak apoiu hirak hanesan ne’e sei bele to’o iha munisipiu sira seluk. Hanesan ohin ita akompaña katak fatin ne’e bele asegura ema hamutuk atus ida (100), tanba hare’e ba situasaun pandemia ne’ebe foin liu dadaun, iha ne’ebe PNTL kaptura no detein ema barak, entaun hare’e ba ida ne’e ita presiza tau atensaun ba kondisaun sela detensaun ninian.
Media PNTL.
