Viqueque, 19 jullu 2022 (SRP) – Hafoin rekolla informasaun hosi família vitima inklui sasin sira relasiona ho kazu asaltu no tentativa omesidiu ba suspeitu ho karakteristika pessoál, isin lotuk, ladun as, hatais faru kor metan ekipa konjunta SIP (Servisu Informasaun Polísia), Munisípiu Viqueque, lansa vijilánsia hodi buka tuir suspeitu no identifika ona autór krime ne’e.
Nune’e komunika kedas mai Forsa Rezerva no Eskuadra PNTL Uatulari, hodi halo kapturasaun ba joven mane ida ho inisiál AS, tinan 34, husi Aldeia Tatilari, Suku Matahoi, Postu Administrativu Uatulari, Munisípiu Viqueque, ne’ebe komete kazu asaltu no tentativa homesidiu hakanek vitima FPG ne’ebé akontese iha area Uaida’e, Suku Uaitame, Postu Administrativu Uatulari, Munisípiu Viqueque.
Tuir kronolojia ne’ebé PNTL rekolla, vitima FPG, tinan 30, husi Aldeia Daralari, Suku Afaloicai, Postu Administrativu Uatucarbau, Munisípiu Viqueque, hetan tá iha loron segunda tuku 00h56 madrugada wainhira sae tuir karreta Angguna ida husi diresaun Uatucarbau mai Viqueque nian.
Wainhira iha viajen ema nain 3 falun oin metin hamrik iha dalan, no vitima FPG husu sira atu ba ne’ebé, suspeitu hakbesik mai iha karreta no hateke tama iha karreta laran la sa’e karreta.
Nune’e wainhira karreta aranka suspeitu AS hasai sasán kroat lansa tá husi kotuk hodi rezulta vitima nia liman sorin parte liman los kanek grave no suspeitu halai tama tiha iha nu laran.
Vitima no pasajeirus sira iha karreta laran la kuñese suspeitu tanba iha kalan no sira falun oin metin. Kondutór halai lalais kedas ba Eskuadra PNTL hodi transporta kedas vitima ba halo kurativu iha sentru saude Uatulari, hodi hetan tratamentu saúde no vitima husu atu PNTL investiga klean kazu ta kanek nia.
Entretantu, suspeitu nia kaben deklara, iha kalan nia kaben suspeitu AS toba la dukur no aranja razaun katak nia laen AS hapara karreta atu sa’e hamutuk tanba karreta la para nune AS lansa kedas tá ba vitima FPG.
Agora daudaun ekipa konjunta entrega ona suspeitu AS ba Eskuadra PNTL Uatolari hodi kontinua halo identifikasaun no investigasaun ligadu ho kazu tentativa omisídiu ne’e.
