Dili, Komandu Polísia Nasional Timor-Leste (PNTL) tersa-feira (11/10) ne’e hetan vizita ida husi Alunos Curso Promoção Capitais (CPC 2022) Falintil Forsa Defesa Timor-Leste (F-FDTL) ne’ebe frekuenta hela kursu iha Instituto Defesa Nacional (IDN). CPC hanesan kursu ida ne’ebe maka halo husi Ofisias Subalternu sira F-FDTL nian hodi prense kriteria promosaun ba Ofisial Kapitaun ida iha Instituisaun F-FDTL nian.
Reprezentante Komandante Jerál PNTL Inspetúr Jerál Superintendente Xefe Carlos Jerónimo iha ninia intervensaun ba vizita ne’e hateten hanesan ohin alunos sira halo ona vizita ba fatin rua iha Komandu Jerál hodi hetan informasaun kona-ba Servisu Investigasaun Kriminal Nasional (SIKN) en jerál nune’e mós hetan informasaun balun iha Departamentu Tránzitu Seguransa Rodoviaria Nasional (DTRSN).
“Espera katak informasaun sira ne’e hotu bele sai hanesan informasaun ne’ebe krebilida ba ita bo’ot sira tanba wainhira ita bo’ot sira atu remata kursu, jeralmente ita sei hakerek buat ruma ne’ebe kona-ba rezultadu sira ne’ebe ita hetan, atu nune’e bele hariku ita bo’ot sira nia hakerek sira ne’ebe ba futuru sai hanesan buat diak ida ba instituisaun ita nia rasik nune’e mós sai hanesan mata-dalan ba ita nia kolega sira ne’ebe tuir mai aban bainrua liu husi dalan ne’ebe agora dadaun ita bo’ot sira liu ba”, tenik Inspetúr Jerál PNTL ne’e.
Superintendente Xefe ne’e haktuir tan katak hau hanoin aktividade sira henesan ne’e iha ne’ebe deit akontese formasaun husi instituisaun, eskola, universidade jeralmente ema dehan katak Estudo do Campo ne’ebe ita halo wainhira ita remata sempre ita hetan problema kona-ba oinsa maka atu hakerek buat hirak ne’ebe ita hetan ona durante kursu.
Iha fatin hanesan Komandante Centro Instrução Comandante Nicolao Lobato (CICNL) F-FDTL Coronel de Infantaria Haksolok iha ninia intervensaun agradese ba oportunidade ida ne’e tanba bele simu ami no hau nia estudante sira mai vizita Kuartél Jerál PNTL.
“Hau nia membru sira ne’ebe frekuenta kursu CPP hamutuk ema na’in 25, maibé iha momentu ne’e sira hamutuk na’in 24, tanba na’in ida ne’ebe tuir ninia espesialidade ne’ebe iha ba hala’o nafatin nia estudu iha Estadu Unidus Amerika, tanba nia iha area Aúreo entaun presijamente ba hala’o tuir ninia espesialidade ne’ebe iha”, esplika Komandante CICLN ne’e.
Coronel de Infantaria salienta hirak ne’ebe ohin hala’o vizita mai Kuartél Jerál PNTL ne’e hamutuk ema na’in 24 ne’ebe mai husi Komponente Terrestre, Komponente Naval, Unidade Espesial, Kuartél Jeneral F-FDTL no Unidade CICLN.
“Hau agradese tebes-tebes ba oferesimentu fatin, tanba atu termina kursu ida ita tenke esforsu oinsa atu bele priense rekezitus liu-liu Lei Interna nian, tanba ne’e ohin ami nia primeira vizita mai iha Kuartél Jerál PNTL atu sira (Alunos CPC) bele aumenta sira nia koñesimentu no kapasidade atu sira bele implementa hafoin sira remata kursu ida ne’e iha sira nia area idak-idak”, hatutan Coronel de Infantaria ne’e.
Iha aktividade ne’e, alunos sira CPC 2022 hala’o vizita ba edifisiu SIKN no DTSRN hodi hetan informasaun balun liga ba servisu hirak ne’ebe halo ona durante ne’e. Hafoin halo vizita ba fatin rua ne’e, kontinua kedas ho aprezentasaun husi Diretúr Rekursu Umanu PNTL Superintendente Asistente Graciano Moniz Amaral kona-ba Organizasaun no Misaun PNTL nian inklui funsaun sira iha PNTL nia laran. Aktividade ne’e partisipa husi Inspetúr Jerál, Komandante Komandu Administrasaun, Komandante CICLN (F-FDTL), Diretúr Rekursu Umanu no alunos CPC 2022 sira akompaña husi Diretúr Kursu CPS 2022 Kapitaun Correia inklui membru sira Departamentu Rekursu Umanu PNTL. Media PNTL.
