Dili, Komandu Polísia Nasional Timor-Leste (PNTL) sexta-feira (14/07) ne’e simu vizita dahuluk Ministru Interior Francisco da Costa Guterres,Ph.D mai iha Kuartél Jerál hodi hare’e no rona dezafiu hirak ne’ebe maka institusaun seguransa ne’e hasoru durante ne’e. iha vizita ne’e hala’o mós enkontru ho estrutura Komandu PNTL nian.
Hafoin aktividade vizita, ba jornalista sira Ministru Interior hateten ohin halo vizita mai PNTL atu rona dezafiu saida maka PNTL infrenta no presiza saida maka governu bele apoiu hanesan infrastrutura no ekipamentu. Iha ne’e ami hare’e ona katak kestaun infrastrutura, ekipamentus, transporte tanba ne’e governu iha komitmentu sei hadia PNTL nia insfrastrutura, hadia sira nia ekipamentus no prepara transporte ba Komandu PNTL.
“Kestaun seluk ne’ebe maka ohin koalia ho Komandu maka kestaun oinsa maka bele hadia diak liu tan prestaun servisu Polísia ninian, atu bele hala’o servisu hanesan atendimentu públiku ne’e lao ho diak, segundu maka oinsa Polísia bele kria mekanizmu atu haforsa liu tan Manutensaun da Paz iha Timor laran tomak”, tenik Ministru Interior ne’e.
Membru Governu ne’e kompremete ona katak kona-ba infrastrutura sei hare’e uluk konstrusaun edifisiu Kuartél Jerál nian tanba ne’e ohin hau hateten ona ba Komandu katak iha tinan 2024 tenke hahu’u ona ninia lansamentu ba Kuartél Jerál. Ninia prosesu deit maka presiza resolve, iha tinan ida ne’e nia laran sei resolve uluk ninia mekanizmu no prosesu hotu, maka iha tinan 2024 sei tama iha lansamentu ba konstrusaun ninian.
“Ita sei mós halo revizaun ba Lei sira kona-ba Regime Salarial no Regime Karreira ninian, atu nune’e sira bele desempeña sira nia papel ne’e ho diak liu tan, no ita mós tenke agradese tanba durante ne’e PNTL konsege hala’o servisu ho diak tebes, ita bele hare’e iha eleisaun tolu ne’ebe liu ona lao ho diak, tanba sira maka pilar esensial ida ne’ebe maka tau hela seguransa ba iha prosesu ne’e rasik”, afirma Membru Governu ne’e.
Francisco da Costa Guterres,Ph.D haktuir tan katak durante aktividade eleisaun tolu ne’ebe liu ona, situasaun seguransa lao ho diak tanba servisu maka’as PNTL nian hanesan wainhira akompaña lori urnas sira husi fatin votasaun no halo kontagem hafoin ikus mai hamosu rezultadu ne’ebe maka diak, ne’e sira hotu tanba servisu Polísia sira nian.
“Ohin mós hau lori Primeiru Ministru nia naran no mós Governu nia naran agradese hela ba servisu ne’ebe PNTL halo diak tebes-tebes durante eleisaun tolu ne’e”, hatutan Ministru Interior ne’e.
Planu Governu nian liu-liu Ministeriu Interior sei hare’e ba PNTL maka iha tinan 2024 sei preparasaun atu halo rekrutamentu ba Polísia foun, sei revê mós Diploma Legais barak ne’ebe maka iha PNTL nia laran, atu nune’e wainhira halo Lei ne’e tenke tuir kondisaun servisu PNTL nian.
Iha vizita dahuluk ne’e, Ministru Interior Francisco da Costa Guterres,Ph.D simu ho Guarda de Honra no tara tais husi Segundu Komandante Jerál PNTL Komisariu Polísia Pedro Belo. Hafoin ida ne’e, membru governu ne’e kontinua hala’o enkontru ho Komandante Jerál PNTL Komisariu Jerál Polísia Henrique da Costa, Segundu Komandante Jerál PNTL Komisariu Polísia Pedro Belo, Komandante Komandu PNTL munisipiu 14, Komandante Unidade, Xefe Departamentu, Xefe Servisu sira ne’ebe tutela iha Komandu Jerál.
Iha biban enkontru ne’e, Komandante Jerál PNTL halo mós aprezentasaun kona-ba Programa Planu Prioridade PNTL nian ba tinan 2023-2026, Dezafiu no Obstákulu ne’ebe maka PNTL hasoru durante ne’e. Hafoin aprezentasaun, Komisariu Jerál Polísia Henrique da Costa entrega Relatoriu Servisu durante Períodu Primeiru nian ba iha Ministru Interior Francisco da Costa Guterres,Ph.D.
Media PNTL.
