Dili- Polisia Nasional Timor-Leste (PNTL)-Departamentu Investigasaun Kriminal (DIK) asegura vitima Trafiku Humanu nain 10 sidadaun Pakistan ne’ebe rekruta husi kompania internasional hodi presta serbisu iha Timor-Leste.
Xefe Departamentu Investigasaun Kriminal Superintendente Polisia João Belo Reis hateten bazeia ba informasaun ne’ebe maka Ami kolekta husi autoridade lokal, parte igreja nomos Serbisu Informasaun Polisia (SIP) ohin ami asegura ona sidadaun nain 10 ne’ebe ita suspeta hanesan vitima ba trafiku humanu husi kompania internasional balu ne’ebe rekruta sira husi Pakistan mai timor hafoin fo serbisu ba sira maibe tuir dadus ne’ebe maka ita iha sira la hetan salariu, sira hetan tratamentu at teb-tebes nune’e PNTL sei halo asaun hotu-hotu ne’ebe lei fo hodi asegura vitima sira nia direitu humanu no prosesu suspetu ne’ebe ita diskumfia hanesan autor ba rekrutamentu illegal depois halo trafiku humanu mai Timor-Leste, Nai ahto’o asuntu ne’e liu husi komferensia Emprensa iha Kuartel jeral Kaikoli Dili, (03/07).
Nia hatutan asaun ne’e komete husi kompania internasional ho inisial KGT Unip.Lda ne’ebe halao nia atividade iha Timor-Leste, kompania ne’e legal no rejistradu maibe asaun ne’ebe maka nain ba kompania halo ne’e diskumfia hanesan trafiku humanu.
Rekrutamentu ne’e halai liu ba atividade Agrikultura nian Hakiak Animal iha Hera no Vitima nain 10 ne’e tama ho tempu lahanesan balu tama iha tinan 2022, 2023 no 2024, tuir informasaun ne’ebe maka PNTl rekolha promesa ne’ebe maka kompania ne’e fo ba sira katak rekruta ho standar salariu hanesan ne’e maibe to’o mai iha timor la fo salariu ba sira.
“PNTL sei halo identifikasaun hotu-hotu no prosesu investigasaun lao hela hafoin finalija prosesu identifikasaun sei aprejenta ba Ministeriu Publiku hafoin Ministeriu Publiku maka iha kompetensia atu halo prosesu tuir mai,” Komandante ne’e esplika.
Vitima sira maioria mane hotu ho sira nia back ground balu hanesan Dotor ba Animal, Marketing, Finansas ho esperensia no kualifikasaun ketak-ketak. Media PNTL
