Balibo, Unidade Patrullamentu Fronteira (UPF) Komandu Polísia Nasional Timor-Leste (PNTL) iha loron 30 fulan Setembro tinan 2024 komemora ninia ezistensia ba dala XXI (21ᵒ) ho Tema “Forte Iha Seguransa, Mamar Hodi Servi Povo No Nasaun RDTL”.
Komandante Jerál PNTL Komisariu Jerál Polísia Henrique da Costa iha ninia diskursu ba selebrasaun aniversariu UPF nian ne’ebe hala’o iha Kuartél UP Fatuk Bo’ot, Batugade-Balibo segunda-feira (30/09) ne’e hateten PNTL nia misaun prinsipal maka atu defende Legalidade Demokrátika, garante seguransa ema ho sira nia propriedade no asegura ezersisiu direitu, liberdade no garante sidadaun sira nian tuir Konstituisaun no Lei sira.
“Tuir Lei Orgânika PNTL, UPF nu’udar Unidade Espesial PNTL foka liu ba supervizaun no kontrola fronteira nian ba ema no sasan sira tama no sai, ho misaun espesifiku ida patrulla iha fronteira rai nian iha koordenasaun ho forsa no servisu sira seluk, kontrola fronteira nu’udar prioridade nasional ida ne’ebe ass liu, ne’ebe sai hanesan dezafiu ba Unidade ida ne’e ho karakteristika úniku tanba ne’e presija servisu operasional ne’ebe ass iha oras 24 nia laran”, tenik Komandante Jerál PNTL ne’e.
Komisariu Jerál Polísia ne’e salienta tan katak ne’ebe dala barak iha kondisaun klímatika ne’ebe ladiak no kondisaun servisu ne’ebe difisil tebes, durante tinan hirak ne’e importansia husi UPF nian iha konteksu seguransa nasional nian aumenta, hodi hatudu papel fundamental ne’ebe nia hala’o iha kontrolu fronteira durante eventu bo’ot sira hanesan iha vizita foin lalais ne’e husi Sua Santidade Papa Francisco mai iha Timor-Leste.
“Aktividade operasional Unidade ida ne’e nian refleta iha kapturasaun oin-oin ne’ebe hala’o husi Unidade ida ne’e iha fronteira sira ne’ebe la autorizado no mós iha aprensaun oin-oin ne’ebe hala’o ona, aproveita oportunidade ida ne’e hakatak informa ba ita hotu katak ita nia membru UPF hamutuk 330 ne’ebe oras ne’e iha la sufisiente atu kobre ita nia fronteira rai maran, mai ho nesesidade urgensia ba rekrutamentu atu kompleta númeru ne’ebe planeia ona, tanba hare’e katak importansia estratéjiku husi ita nia fronteira, UPF hetan mós apoiu husi Unidade Espesial Polísia (UEP) no Komandu munisipiu sira hodi kumpri misaun Polísia ninian”, hatutan Komisariu Jerál Polísia ne’e.
Autoridae másimu instituisaun Seguransa ne’e fundamenta tan katak iha mós nesesidade urgente atu hadia kondisaun membru PNTL sira nian liu-liu UPF, liu-liu manutensaun ka reparasasun ba edifisiu sira ne’ebe eziste ka konstrusaun edifisiu foun sira, atu nune’e bele kontribui ba membru Unidade ida ne’e ninia moris diak no promove espéritu misaun nian iha edifisiu sira.
Iha fatin hanesan reprezentante Ministru Interior aktual Sekretariu Estadu Protesaun Sivil Domingos Mariano Reis iha ninia diskursu ba serimonia ne’e hateten eventu ohin nu’udar eventu espesial ida ne’ebe Konsagra ona iha Konstituisaun Repúblika iha artigu 147 katak PNTL garantia estabilidade interna no UPF ne’ebe hatu’ur ona iha artigu 178 hodi garantia estabilidade iha fronteira atu bele kontrola movimentu sidadaun Timor oan sira no sidadaun estrangeiru sira iha fronteira.
“Ita bo’ot sira nia kontribuisaun no dedikasaun ba nasaun ne’e bo’ot no importante tebes, husu nafatin atu imi mantein komunikasaun ho seguransa fronteira Indonesia ninian hodi bele garantia estabilidade, paz no harmonia iha fronteira atu bele kontribui ba dezenvolvimentu nasaun nian, ita bo’ot sira nia prezensa iha fronteira fó konfiansa ba povu Timor-Leste tomak katak ita bo’ot sira maka Lutu ba nasaun ne’e nian”, haktuir reprezentante Ministru Interior ne’e.
Sekretariu Estadu Protesaun Sivil ne’e salienta tan katak ita hotu hatene katak UPF ho rekursu ne’ebe limitadu la signifika katak nu’udar bareira ida ba ita bo’ot sira nia misaun maibé nu’udar esperiensia/referensia durante ita bo’ot sira nia misaun, iha ita bo’ot sira nia kna’ar loron-loron ne’ebe maka depozita ona iha ita bo’ot sira nia aktividade loron-loron ninian.
“PNTL nu’udar Pilar daruak ninian husi sistema Seguransa Nasional, Nonu Governu Konstitusional nafatin tau prioridade no aposta, fó prioridade ba UPF iha Planu Annual, Planu Estratéjiku Dezenvolvimentu 2011-2030 hodi asegura seguransa iha fronteira, hanesan Sekretariu Estadu Protesaun Sivil nafatin husu ba UPF atu mantein imparsialidade, honestidade, loyalidade, umanidade, neutru, firme, unidade iha ita bo’ot sira nia misaun atu bele fó konfiansa ba ita nia populasaun sira iha fronteira ne’ebe maka Paz, Seguru no harmonia”, haktuir Sekretariu Estadu Protesaun Sivil ne’e.
Marka prezensa iha serimonia aniversariu UPF ne’e reprezentante Ministru Interior aktual Sekretariu Estadu Protesaun Sivil Domingos Mariano Reis, Komandante Jerál PNTL ho esposa, Segundu Komandante Jerál ho esposa, reprezentante Prezidente Autoridade munisipiu Bobonaro, reprezentante Prezidente Autoridade RAEOA, reprezentante Prokurador Jerál Republika, Komandante TLPDP, Adidu Seguransa Embaixada Republika Indonesia, Komandante munisipiu 13, Diretur Jerál no diretur sira iha Postu Integradu Mota-ain, grupu Voluntariu Mama Bolu no konvidadu sira inklui estrutura Komandu UPF, membru hamutuk ho familia. Media PNTL
