Dili, Ekipa husi Komponente Polísia Militar FALINTIL Forsa Defesa Timor-Leste (F-FDTL) iha loron 15 fulan Outubru tinan 2024 iha oras 16:30 halo auto entrega objeitus aprendidus hanesan Fugetes (Sasan Kontra Bandu) hamutuk kaixa 50, ba Komandu Polísia Nasional Timor-Leste (PNTL) liu husi Departamentu Investigasaun Kriminal Nasional (DIKN) hodi halo investigasaun ba objeitus aprendidus sira ne’ebe ekipa prende iha parte munisiupiu Liquiça, Suku Dato iha loron 15 fulan Outubru tinan 2024 iha oras 01:30 madrugada.
Xefe DIKN Superintendente Polísia João belo dos Reis liu husi Konferensia imprensa ne’ebe hala’o iha loron 16 fulan Outubru tinan 2024 hateten objeitus aprendidus hirak ne’e sidadaun Timor oan ida ho inisial AFL husi Suku Dato, munisipiu Liquiça hamutuk ho nia maluk na’in 7 seluk hatama liu husi Tasi ho illegal.
“Objeitus aprendidus hirak ne’e maka hanesan husi Fugetes kaixa bo’ot hamutuk 50 kompostu husi Fugetes ho Marka IF 0201 smoke 3 hamutuk kaixa 32, Fugetes ho Marka IF 201 smoke 2 hamutuk kaixa 5 no Fugetes ho Marka W 3013T Happy Flower hamutuk kaixa 13, agora dadaun DIKN halo hela investigasaun atu identifika autor sira ne’ebe responsavel ba tentasaun atu halo Tráfik sasan illegal liu husi Tasi ne’ebe ita nia maluk sira husi F-FDTL prende orseik”, esplika Xefe DIKN ne’e.
Superintendente Polísia ne’e salienta tan katak PNTL sei servisu hamutuk nafatin ho parseiru sira atu halo operasaun ba sasan kontra bandu ne’ebe tama liu husi Tasi no mós rai maran tanba sira la kontribui hodi selu taxa ba Estadu no mós desvia husi kontrolamentu atuoridade seguransa nian.
“Sim, ami identifika mós autor ida ne’ebe maka fasilita sasan ne’e tama mai, autor ne’e insial AFL husi munisipiu Liquiça, sasan sira ne’e hafoin halo proseu identifikasaun maka DIKN sei submete ba iha Ministeriu Públiku (MP) ohin, suspeitu oras ne’e dadaun ami sei halo identifikasaun no mós sei kontinua halo identifikasaun ba parte seluk ne’ebe envolve iha kazu kontra bandu ida ne’e”, hatutan Superintendente Polísia ne’e.
Ofisial Superior PNTL ne’e apelo mós ba sidadaun sira hotu, primeiru maka atu evita importa sasan ne’ebe maka laiha Lisensa, La Liu dalan Legal tanba ne’e la kontribui ba selu taxa Estadu no mós bele prejudika sidadaun sira nia moris hakmatek tanba wainhira ita sunu arbiru, ita sunu la tuir nia tempu bele fó perigu ba ema sira ne’ebe moras, bele fó perigu bairu laran la hakmatek no mós bele fó perigu vida ba ema sira ne’ebe uza sasan ne’e.
“PNTL La Tolera ba auto krime sira ne’ebe maka akontese hanesan dadaun ne’e, tanba ne’e apela ba sidadaun sira hotu karik detekta, hare’e ho matan ka rona ema ruma faan sasan sira ne’e, bele informa lalais ba Autoridade atu ami bele halo atuasaun”, akresenta Xefe DIKN ne’e. Media PNTL.
