Dili, Komandu Polísia Nasional Timor-Leste (PNTL) liu husi Komandante Jerál Komisariu Jerál Polísia Henrique da Costa iha loron tersa-feira (05/11) ne’e fó posse ba Komandante Komandu PNTL munisipiu Baucau no Komandante Unidade Apoiu Servisu (UAS) Komandu Jerál.
Liu husi Despasu Gabinete Komandante Jerál ho Nu.550/CG-PNTL/X/2024 nomea Superintendente Xefe Polísia António Maria de Sá nu’udar Komandante Komandu PNTL munisipiu Baucau no Despasu Gabinete Komandante Jerál ho Nu.551/CG-PNTL/X/2024 nomea Superintendente Xefe Polísia Antoninho Mauluta nu’udar Komandante UAS.
Hafoin serimonia tomada de posse ba Jornalista sira, Komandante Jerál PNTL hateten rotasaun no nomeasaun iha servisu PNTL ninian ne’e bain-bain, buat ne’ebe maka ita husu ba Komandante Munisipiu foun maka tenke hametin liu tan relasaun, komunikasaun ho Autoridade lokal sira hahu’u husi Prezidente Autoridade ba mós administrador postu sira, Xefe Suku, Organizasaun Nasional no Internasional sira maka iha ne’eba, parte Igreja, Veteranu, Juventude atu nune’e hodi hasa’e liu tan medida prevensaun ba krime ninian liu-liu ba aktividade polisiamentu komunitaria ninian.
“Ita hatene katak iha Baucau problema sempre mosu, liu-liu ataka malu grupu sira, joven sira ne’ebe maka mai ho sira pasadu/background balun treinu iha fatin ida ba ataka malu fali joven sira husi grupu seluk nian, ida ne’e sai hanesan traballu ida ba Komandante munisipiu foun, atu ba buka meius oinsa atu nune’e hodi mantein komunikasaun ho autoridade lokal sira iha ne’eba (Baucau), halo mós koordenasaun ho ita nia Unidade Espesial Polísia (UEP) ne’ebe destakadu iha Baucau no ita mós hatene katak iha Baucau iha mós Forsa Defesa ninian, Komponente Terrestre ne’ebe maka koloka iha ne’eba halo mós koordenasaun atu nune’e bele halo medida prevensaun ruma”, tenik Komandante Jerál PNTL ne’e.
Komisariu Jerál Polísia ne’e salienta tan kona-ba durasaun kargu Komandante munisipiu ida nian katak ita laiha regra ida atu hateten dehan assume Komandante munisipiu ida to’o tinan sanulu ka tinan rua-nulu ka laiha, ne’ebe ita hare’e kona-ba nesesidade Komandu ninian presija iha ne’ebe, hafoin ita halo nomeasaun hodi koloka sira ba iha ne’eba.
Entretantu, emposadu Superintendente Xefe Polísia António Maria de Sá nu’udar Komandante Komandu PNTL munisipiu Baucau hafoin serimonia ba Jornalista sira hateten kna’ar ne’ebe maka foin simu laos buat foun tanba antes ne’e assume ona kargu nu’udar Komandante munisipiu Baucau.
“Neste momentu simu tan fiar ida ne’e ba iha munisipiu Baucau ne’ebe maka hanesan ita hotu hatene katak Baucau hanesan segundu sidade hafoin Dili tanba Baucau sai hanesan sentru ida ne’ebe guia ba munisipiu Lautem no Viqueque, entaun wainhira krime sira tama mai kapital Dili tenke trava uluk iha Baucau, tanba ne’e Baucau sai hanesan sidade ida ita tais kedas ou trava kedas ninia krime sira ne’e, reduz kedas antes tama kapital Dili”, esplika emposadu ne’e.
Superintendente Xefe Polísia ne’e afirma tan katak tanba ne’e ho kna’ar no fiar ida ne’e katak hau sei hala’o ho responsabilidade no sei servisu koordenasaun ho parte hotu iha munisipiu Baucau tanba rai ne’e ita nian entaun Timor oan hotu-hotu tenke iha sentimentu partense ba rai ida ne’e. Laos rai ne’e dehan Polísia ka Militar nian mesak maibé ita hotu nian, entaun Timor oan hotu tenke iha dever no obrigasaun atu bele tau matan ba rai ne’e, asegura ho diak.
Hola parte iha serimonia tomada de pose ne’e maka Komandante Komandu Pesoal no Formasaun, Inspetúr Jerál, Komandante Komandu Administrasaun, Diretúr Diresaun Justisa no Disiplina, Komandante Unidade (UEP, UPM,UPF), Komandante CFP, Xefe Gabinete, Xefe Servisu sira iha Kuartél Jerál. Media PNTL.
