Dili, Komandu Polísia Nasional Timor-Leste (PNTL) liu husi Komandante Jerál Komisariu Jerál Polísia Henriuqe da Costa iha loron kinta-feira (07/11) ne’e ofisialmente entrega Resultadu Ezame DNA Saudozu Lino da Costa ‘Olo-Cassa’ ba reprezentante Komandu Falintil Forsa Defesa Timor-Leste (F-FDTL) Coronel Rinelde Corterial.
Hafoin serimonia ne’ebe realiza iha Kuartél Jerál ba jornalista sira, Komandante Jerál PNTL hateten iha Komandu PNTL iha Departamentu Investigasaun Kriminal nian okos iha seksaun Forensik ninian, ne’ebe amak ninia kna’ar ne’e ida maka hodi halo ezaminasaun sira inklui ezaminasaun ba iha DNA ninian no mós ba iha Liman Leu/Finger Print ninian, ita iha kapasidade, iha ita nia membru sira ne’ebe maka hetan ona formasaun no treinamentu ne’ebe relevante ba iha hala’o servisu espesífiku ida ne’e.
“Tanba ne’e, Ita mós estabelese ita nia ligasaun ho parseiru sira seluk hanesan nasaun Australia no Indonesia ne’ebe maka apoiu ita hodi halo teste ba ida ne’e, ida foin dadaun Saudozu Lino da Costa ninian ita halo komunikasaun ho nasaun Indonesia, ho Universidade ida iha Indonesia ne’ebe maka ita nia membru ida uluk, nia eskola iha ne’eba, nia hetan kursu iha ne’eba maka ho koordenasaun no kooperasaun ne’ebe maka ita iha hodi simu ruin ida ne’e atu halo teste iha ne’eba”, esplika Komandante Jerál PNTL ne’e.
Komisariu Jerál Polísia ne’e afirma tan katak husi prosesu sira ne’e hotu ita hare’e katak resultadu pozitivu, ba oin karik ita hetan nafatin konfiansa maka ita sei mantein komunikasaun, ligasaun ho sira parte Indonesia ninian atu nune’e bele apoiu ita ba iha teste sira ne’e hotu.
“Ita iha kapasidade ba ida ne’e, ita iha difikuldade ida maka kona-ba buat sira seluk hanesan orsamentu sira, entaun prosesu sira foin dadaun ba kotuk ne’e ita nia membru sira pronto preparadu no orsamentu ne’e apoiu husi Ministeriu Asuntu Kombantentes ninian, tanba ne’e ohin hau ho Sekretariu Estadu koalia ona katak ba futuru ami pronto hodi apoiu nafatin, parte Sekretariu Estadu hare’e mós apoiu fundus ruma atu ita nia membru sira hodi hala’o servisu ida ne’e tanba ita hatene sé buat ne’e halo iha rai liur, presiza billete aviaun ninian, presiza hotel sira toba, presiza transporte ruma sira halo movimentu iha ne’eba, ida ne’e maka ita husu ba ministeriu relevante”, hakotu Komisariu Jerál Polísia ne’e.
Entretantu, Sekretariu Estadu Veteranu César dos Santor da Silva ba jornalista sira hateten relasiona ho prosesu ida ne’e, laos katak primeira vés maka hala’o otopsia ne’e maíbe halo dala barak ona, ne’ebe seidauk detekta, ida ne’e foin primeira vés bele detekta ona katak los duni mate ruin ida ne’e pertense duni ba familia oan kiak Saudozu Lino da Costa nian.
“Tanba ne’e hau lori Ministeriu Asuntus Kombatentes Libertasaun Nasional nia naran heteten deit katak Ministeriu en koordenasaun ho instituisaun relevante liu-liu ba PNTL atu ami hare’e prosesu ne’e, ida ne’e hanesan primeira faze, tuir mai ami sei hare’e nafatin tanba restus mortais balun oras ne’e dadaun iha hela HNGV atu submete ba prosesu autopsia”, haktuir Sekretariu Estadu ne’e.
Membru Governu ne’e salienta tan katak Ministeriu Asuntus Kombatentes Libertasaun Nasional iha liña koordenasaun ne’ebe maka diak tebes-tebes ho PNTL hodi hala’o aktividade ne’ebe relasiona ho restus mortais ka veteranu ida ninia mate.
Iha fatin hanesan, reprezentante familia, oan husi Saudozu Lino da Costa ‘Olo-Cassa’ Lino Correia hafoin serimonia hateten lori familia nai naran agradese ba entidade hotu ne’ebe envolve iha prosesu tomak teste DNA ne’e nian, liu-liu ba Nonu Governu liu husi Primeiru Ministru, Ministru Asuntus Kombatentes Libertasaun Nasional, Ministeriu Interior ne’ebe lidera PNTL no ba ekipa tomak ne’ebe maka hola parte iha prosesu sira ne’e hotu.
“Ami agradese ba esforsu tomak PNTL ninian liu-liu ekipa Forensik nian ne’ebe maka professional tebes maske ita iha limitasaun oin-oin maibé sira fó esforsu tomak ba iha prosesu ida ne’e”, haktuir oan husi Saudozu Lino da Costa ‘Olo-Cassa’.
Prosesu hala’o teste Ezame DNA ba Saudozu Lino da Costa ‘Olo-Cassa’ hahu’u iha insiu tinan 2024 no remata prosesu hodi hetan rezultadu ikus iha fulan Outubru tinan 2024 katak los duni ruin ne’ebe maka aprezenta katak ne’e ruin husi Saudozu Lino da Costa ‘Olo-Cassa’.
Media PNTL.
