Dili, Komandu Polísia Nasional Timor-Leste (PNTL) liu husi Departamentu Investigasaun Kriminal Nasional (DIKN) aprezenta ona kazu Bala Musan ne’ebe maka monu iha Eis Prezidente Repúblika (PR) Francisco Guteres Lu-Olo nia residensia iha loron 01 fulan Janeiru 2025 iha oras tuku 01:30 madrugada.
Liu husi Konferensia Imprensa tersa-feira (07/01) ne’e Xefe DIKN Superintendente Polísia João Belo ba jornalista sira relata kona-ba situasaun ne’ebe akontese iha loron 01 fulan Janeiru madrugada, akontese wainhira ema akompaña tiru fugetes, ema deskoñesidu balun tiru Bala ba leten hodi rezulta Bala ne’e monu kona uma Eis PR Lu-Olo nian.
“Hafoin iha oras 11:30 ekipa DIKN hamutuk ho ekipa tékniku Forensik nian, ami halo mós rekonstrusaun ba fatin akontesimentu, identifika katak Bala ne’e monu duni iha ne’eba, depois ita hatene mós katak ne’e rezulta husi tiru ba leten, kilat musan ne’ebe maka monu ne’e nove milimetru (Prozetil Nove Milimetru), ita seidauk hatene ida ne’e mai husi Kilat tipu ida ne’ebe, maibé ita hatene ona katak ne’e mai husi Kilat ki’ik, maibé tipu pistola ida ne’ebe (Pistola Revolver ka Pistola Blok) ita seidauk hatene, la hanesan ho maluk sira nia publikasaun iha Media Sosial katak ida ne’e Pistola Revolver”, informa Xefe DIKN ne’e.
Superintendente Polísia ne’e salienta tan katak ba ida ne’e DIKN mós aprezenta ona kazu ne’e ba MP, hafoin ami halo tiha identifikasaun no rekonstrusaun iha fatin akontesimentu, ami aprezenta ona ba MP ho númeru NUC.003/2025/PNSIK. PNTL liu husi DIKN husu apoiu mós ba parseiru sira atu halo ezame ba Prozetil ka Bala ne’ebe maka hetan, tanba ita nia aparellu seidauk sufisiente, entaun ita husu ita nia parseiru sira atu halo ezame balistiku ba Prozetil ne’ebe maka ita hetan.
“Nune’e mós PNTL husu apoiu tanba prosesu investigasaun sei lao hela, husu apoiu ba komunidade ka ema balun ne’ebe hatene lalaok ka hare’e ema ruma tiru iha tempu ne’eba, husu atu informa ami atu ami bele halo prosesu investigasaun klean, tanba to’o agora ema ne’ebe maka tiru iha tempu ne’eba ita seidauk hatene ka sei deskoñesidu hela”, hatutan Superintendente Polísia ne’e.
Ofisias Superior PNTL ne’e akresenta tan katak iha loron hanesan (01 Janeiru 2025) oras maka diferente oituan (tuku 02 madrugada), iha mós kazu ida akontese iha parte munisipiu Dili nian, rezulta mós alin feto ida ho tinan ha’at (4) naran Agresiela Pie da Costa mós hetan tiru laos direita maibé kilat musan monu kona nia ain no oras ne’e halo hela tratamentu iha HNGV.
Durante Períodu Natal & Tinan Foun, DIKN Rezista Kazu Maioria Asaltu Malu
Departamentu Investigasaun Kriminal Nasional (DIKN) durante periodu Natal no Tinan Foun rezista kazu maioria Asaltu Malu iha grupu sira bairu nian iha teritoriu nasional Timor-Leste laran tomak.
Xefer DIKN Superintendente Polísia João Belo relata kazu asaltu malu ne’e akontese iha teritoriu nasional Timor-Leste laran tomak entre Grupu Arte Marsias sira iha kada bairu hamutuk kazu 21.
“Kazu tuir mai ne’ebe maka rezista maka hanesan kazu tuda malu hamutuk lima no kazu violensia domestika hamutuk kazu 20, kazu sira ne’e maka ita konsidera kazu bo’ot ne’ebe akontese durante loron 22 fulan Dezembru tinan 2024 to’o loron 02 fulan Janeiru tinan 2025”, informa Xefe DIKN ne’e.
Prosesu hotu-hotu ba kazu sira ne’e hafoin halo identifikasaun no investigasaun, ita aprezenta hotu ba Ministeriu Públiku (MP). Kazu hirak ne’e barak liu akontese iha munisipiu Baucau, Viqueque no kapital Dili. Situasaun seguransa iha teritoriu Timor laran tomak bele dehan kontroladu tanba kooperasaun husi entidade hotu-hotu, komunidade ho Polísia lao diak tebes-tebes, parseiru Polísia nian ami koopera malu diak tebes-tebes hodi asegura Natal ho Tinan Foun ba komunidade ho seguru. Media PNTL.
