Baucau, Komandante Jerál interinu Polísia Nasional Timor-Leste (PNTL) aktual Segundu Komandante Jerál Komisariu Polísia Pedro Belo iha loron kinta-feira (16/01) ne’e hala’o vizita servisu ida ba Komandu PNTL munisipiu Baucau hodi hato’o orientasaun Komandu nian ba membru sira atu apoiu programa Governu iha munisipiu Baucau.
Iha ninia diskursu ba formatura ne’ebe hala’o Komandu PNTL Munisipiu Baucau, Komisariu Polísia Pedro Belo hateten uluk kna’ain hakarak agradeses no parabéns ba membru sira hotu ne’ebe durante tinan ida (2024) ita bele servisu diak tebes-tebes, iha rezultadu ida ne’ebe maka ema hotu bele sente tantu iha Vizita Amo Papa nian, iha ne’ebe esforsu membru PNTL munisipiu Baucau halo hodi servisu hamutuk ho Autoridade Lokal sira no mobiliza Sarani barak husi Munisipiu Baucau hodi partisipa Misa iha Tasi-Tolu.
“Ita mós aseguura diak tebes-tebes seguransa durante selebrasaun Natal no Tinan Foun ne’ebe mak liu ona no dala tan parabéns ba imi hotu-hotu hahu’u husi estrutura Komandu munisipiu, Komandante Eskuadra, Komandante Seksaun no membru hotu, susesu ida ne’e susesu ita bo’ot sira nian”, afirma Komandante Jerál interinu ne’e.
Komisariu Polísia ne’e salienta tan katak buat balun ita bele halo no buat balun mós dala-ruma halo ema ladun kontente maibé ida ne’e hanesan dezafiu ida ne’ebe maka ita tenke ultrapasa, kualkér situasaun deit ita sempre hasoru maibé ita ho koragem nafatin hodi ultrapasa situasaun hotu-hotu ne’ebe maka durante tinan ida nia laran.
“Hanesan ita hotu hatene katak, oras ne’e dadaun iha programa ida ne’ebe importante Governu hala’o hela iha teritoriu nasional liu-liu iha kapital Dili no mós iha kapital Munisipiu Baucau ne’ebe maka ho programa ida bolu dehan katak eviksaun ne’ebe maka lao dadaun, iha nasional sira halo eviksaun ba fatin lubuk ida ona no agora kontinua ba iha area Dom Aleixo nian liu-liu sira ne’ebe hela iha Mota ninin”, hatutan Komisariu Polísia ne’e.
Segundu Komandante Jerál PNTL ne’e afirma tan katak iha munisipiu Baucau mós hanesan ita hotu hatene iha fatin lubuk ida hanesan iha Villa Antiga Merkadu uluk sira fan sasan iha ne’eba muda hotu ona ba iha Villa Nova.
“Iha eviksaun nia laran mosu mós problema ruma ne’ebe maka akontese, hanesan ita bo’ot sira akompaña, hahu’u iha dezafiu lubuk ida ne’ebe maka membru sira ultrapasa liu-liu ita nia maluk sira husi Guarda Munisipal, Jestaun Merkadu ho ekipa traballu ne’ebe maka hamutuk hasoru situasaun lubuk ida, hanesan mós situasan ne’ebe akontese iha Villa Nova nian”, afirma Segundu Komandante Jerál ne’e.
Komandante Jerál interinu PNTL ne’e apela ba membru sira hotu iha Komandu PNTL munisipiu Baucau atu nafatin koragem no tau ann iha klaran hodi apoiu nafatin ba programa governu ne’ebe lao dadaun. Ita asegura ekipa tomak ne’ebe maka hola parte iha eviksaun ne’e wainhira hala’o servisu iha terenu. Media PNTL.
