Dili, Komandu Polísia Nasional Timor-Leste (PNTL) liu husi Diresaun Servisu Investigasaun Kriminal Nasional (DSIKN) relata katak iha loron 06 fulan Jullu tinan 2025 oras 11 komunidade informa Polísia Munisipiu Ainaro katak sira hetan mate isin ida hamutuk ho nia motor inklui ekipamentus balun iha rai lolon bo’ot ida.
Porta Voz Komandu PNTL Superintendente Polísia João Belo dos Reis liu husi Konferensia Imprensa Segunda-feira (07/07) ne’e informa hafoin hetan informasaun, Polísia Munisipiu Ainaro halo kedas intervensaun, identifika katak sidadaun ida naran Peregrina da Conceição naran istimadu Amina, ho idade tinan 23 mate iha fatin ne’eba.
“Nune’e, Servisu Informasaun Polísia (SIP), Servisu Investigasaun Kriminal hamutuk ho Komandu PNTL Munisipiu Ainaro, Komandu PNTL Munisipiu Likisa, ita halo tracking kedas ba informasaun hirak ne’ebe ita rekolla no ikus mai hori-kalan (06/07) iha oras 09:00 kalan, Suspeitu ho inisial M.D ita kaptura iha Munisipiu Dili area Dom Aleixo ninian, no agora dadaun hakarak informa ba públiku katak Suspeitu iha ona Polísia nia liman, iha Sela Detensaun Eskuadra PNTL Dom Aleixo, Comoro”, informa Porta Voz Komandu PNTL ne’e.
Aktual Diretúr Diresaun Servisu Investigasaun Kriminal Nasional (DSIKN) ne’e salienta tan katak kronologia husi akontesimentu ne’e, hau labele koalia iha ne’e tanba hola parte iha Segredu Justisa no agora dadaun prosesu investigasaun sei lao hela. Hakarak informa mós katak mate isin orseik kedas evakua ona mai Dili, agora iha ona Hospital Nasional Guido Valadares (HNGV) hodi hein prosesu Autopsia.
“Prosesu Autopsia sei termina katak mate ne’e kauza husi oho ka ema baku, investigasaun sei lao hela no ema ne’ebe ita deskonfia envolve iha kazu ne’e, ita asegura ona no vitima origem husi suku Asumanu, munisipiu Likisa, suspeitu sei kumpri iha Sala Detensaun durante oras 72 nia laran hafoin sei aprezenta ba Ministeriu Públiku (MP)”, hakotu aktual Diretúr Diresaun Servisu Investigasaun Kriminal Nasional (DSIKN) ne’e.
Media PNTL.
