𝐃𝐒𝐈𝐊-𝐏𝐍𝐓𝐋 𝐒𝐮𝐬𝐞𝐬𝐮 𝐈𝐡𝐚 𝐎𝐩𝐞𝐫𝐚𝐬𝐚𝐮𝐧 𝐏𝐫𝐞𝐧𝐝𝐞 𝐎𝐬𝐚𝐧 𝐅𝐚𝐥𝐬𝐮 𝐌𝐢𝐥𝐥𝐚𝐮𝐧 𝐔𝐒𝐃$ 𝟒.𝟎𝟎𝟎.𝟎𝟎

𝐃𝐈𝐋𝐈 (𝟏𝟓/𝟎𝟒/𝟐𝟎𝟐𝟔), Autoridade Seguransa Diresaun Servisu Investigasaun Kriminal (DSIK) iha Polísia Nasionál Timor-Leste (PNTL) susesu iha operasaun konsege prende osan Falsu dollar Amerikanu millaun USD$ 4.000.00 ne’ebé sidadaun estranjeiru sira asegura hela iha armajen loja xineza ida, lokaliza iha aldeia Sagrada Família, Suku Bidau Santa-Ana, postu administrativu Cristo rei Munisípiu Dili.

Hafoin ezekuta operasaun ekipa movel DSIK kumpri ordem lokaliza paradeiru armajen iha loron 14/04, hodi aprezenta ba komandu operasaun PNTL halo planu orienta kedan ekipa DSIK halo operasaun iha loron 15/04 2026 tuku 10:00 Otl dader ba direita iha armajen loja xineza ida ne’ebé indetifikadu iha Bidau Santa-Ana foti medidas halo apreensaun konsege rekolla evidensia osan falsu millaun USD$ 4.000.00 no detein kedan sidadaun na’in haat hodi submete ba prosesu indentifikasaun iha edifisiu Diresaun Servisu Investigasaun Kriminal nia fatin iha Kuartel Jerál PNTL Caicoli.

Iha prosesu indentifikasaun ne’e hetan kedas vizita urjenti husi Primeiru Ministru Kayrala Xanana Gusmão hodi haree direita osan Falsu no kongratula susesu servisu di’ak ne’ebé autoridade seguransa DSIK hatudu duni rezultadu ho profesionál konsege deskobre osan Falsu millaun USD$ 4.000.00, maioria osan tahan USD$ 100.00 dollar Amerikanu ne’ebé sidadaun estranjeiru sira asegura iha armajen ida iha Bidau Santa-Ana.

Hafoin Primeiru Ministru Kayrala Xanana Gusmão haree tiha osan hirak ne’e kontinua fó orientasaun ba Komandante Jerál PNTL Komisariu Assistente Polísia Afonso dos Santos ho Segundu Komandante Jerál PNTL Komisaria Assistente Polísia Natercia Eufrasia Soares Martins atu orienta ekipa DSIK kontinua hatudu professional halo Investigasaun ida klean, buka tuir tan autór sira seluk.

Iha Konferensia imprensa Komandante Jerál PNTL Komisariu Assistente Polísia Afonso dos Santos informa prezensa Primeiru Ministru Kayrala Xanana Gusmão iha Kuartel Jerál PNTL, haree direita rezultadu operasaun ne’ebé ekipa DSIK hatudu konsege deskobre osan Falsu ne’ebé sidadaun estranjeiru sira asegura iha armajen hodi fó atensaun makaas ba PNTL kontinua halo Investigasaun klean buka tuir tan autór sira seluk ne’ebé utiliza osan ne’e sirkula iha TL.

“Hanesan komandante jerál la ko’alia barak, maibe prezensa Primeiru Ministru Kay Rala Xanana Gusmão iha kuartel jerál PNTL hodi haree direita rezultadu servisu ne’ebé PNTL-DSIK hatudu, tanba ne’e informasaun hotu Komandante Operasaun hamutuk ho DSIK sei atualiza ba publiku atu hatene no orientasaun servisu operasaun la’o nafatin,” informa Komadante jerál PNTL Komisariu Asistente Polísia Afonso dos Santos, liuhusi Konferensia Imprensa ba jornalista iha sala konferensia kuartel jeral PNTL Caicoli ohin Kuarta-Feira.

Lider Masimu PNTL, Komisariu Asistente Polísia Afonso dos Santos mos hato’o apelu ba komunidade atu servisu hamutuk ho autoridade seguransa PNTL, bainhira hetan osan falsu sirkula iha Timor-Leste.

“Ha’u komandante jerál hau nia apelu ba timoroan hotu servisu hamutuk ho seguransa, bainhira hetan osan falsu sirkula iha TL, tanba ne’e informasaun kona-ba ida ne’e orsida komandu operaaun hamutuk ho investigasaun sei koalia, maibe aktu ida ne’e ha’u sei la tolera asuntu sira hanesan ne’e, sé de’it ha’u la tolera ida ne’ebé mak detekta ona polísia halo kapturasaun entrega ba justisa halo prosesu tuir lei ne’ebé vigora iha TL,” Tenik Komisariu Asistente Polísia Afonso dos Santos.

Iha fatin hanesan Portavós Polísia Nasionál Timor-Leste (PNTL) Superintendente-Xefe Polísia João Belo dos Reis, hateten, sente orgullu tebes operasaun ne’ebé mak ekipa DSIK halo hatudu rezultadu diak, hetan atensaun husi sua Exelensia Primeiru Ministru KayRala Xanana Gusmão motiva PNTL- DSIK nafatin solidu hatudu profissional nafatin halo servisu.

Diretor DSIK ne’e afirma, molok halo operasaun iha inisiu ekipa movel DSIK deskobre uluk ona paradeiru armajen ne’e ho informasaun ida kredivel, entaun ohin loron Kuarta (15/04/2026) hale’u tuku 10:00 Otl dader ekipa DSIK halo intervensaun ba iha armajen boot ida iha parte Bidau Santa-Ana hodi halo apreensaun ba evidensia osan falsu sira.

“Depois ita detekta katak loos duni saida mak ita deskonfia ne’e eziste iha ne’ebá nune’e ita halo intervensaun ita rekolla faktus hotu-hotu ne’ebé relasaun ho krime ne’ebé akontese ita detekta osan falsu kaixa-6 ne’ebé mak sira koloka iha kada kotak balun iha ne’ebá, husi ne’e ita halo kalkulasaun temporáriu seidauk loos kuaze osan dóllar Amérikanu millaun USD$ 4.000.00 mak iha ne’ebá,” informa Superintendente Xefe polísia João Belo dos Reis.

Porta vos PNTL ne’e dehan, bainhira halo tiha intervensaun autoridade seguransa sira lori kedan evidensia sira ne’e mai kuartel jerál PNTL, ekipa husi Forensik hamutuk ho ofisiál husi Ministeriu Públiku halo kontajen dadauk, depois montante hira mak iha laran loloos sei fó sai ba públiku tuir mai.

“Mensajen ne’ebé mak Exelensia Primeiru Ministru Kay Rala Xanana Gusmão fó ba ami, atu kontinua halo operasaun ne’e, tanba ne’e ha’u hato’o ba komunidade sira ita nia autoridade sira, ne’ebé detekta deskonfia osan falsu komunika lalais ba ami ka autoridade postu polísia ne’ebé besik ita bele halo intervensaun buka tuir nafatin autór sira ne’ebé komete krime hanesan ne’e,” dehan Portavós PNTL.

Porta vos PNTL ne’e afirma, atividade intervensaun ida-ne’e ekipa DSIK halo monitorizasaun, no traking kleur tiha ona fulan rua liu bá, sidadaun ne’ebé utiliza osan ne’e halo sirkulasaun iha sidade Dili.

“Ami halo traking ba ema ne’ebé mak ami deskonfia bainhira ami detekta sirkulasaun osan falsu ne’e iha loja balun iha area Komoro. Ema relata ba ami halo prosesu aprezenta ba Ministériu Públiku (MP) no ami hetan delegasaun kompetensia ohin ami ezekuta ida ne’e ho di’ak tebes,” afirma Portavós PNTL.

Porta vos PNTL hatutan, iha proseu investigasaun ekipa DSIK sei servisu hamutuk ho alfandega atu detekta husi númeru importasaun sira tau iha kaixa ne’ebá tama mai Timor-Leste ne’e iha loron saida, tama oinsá, sé mak fasilita, sé mak lori tama ida ne’e ekipa PNTL-DSIK sei buka tuir.

Aleinde ne’e PNTL mos sei servisu hamutuk mós Banku Sentral atu identifika osan nia plasifika oinsá, tanba iha fulan rua liu ba vítima sira hato’o keixa no aprezenta kedan ba iha Banku Sentral halo ezaminasaun kompara ho osan orijinál depois hatama ba mesin katak ne’e osan falsu.

Agora Evidensia osan falsu sira ne’ebé ohin ita foti mak númeru importasaun ne’ebé sira tau iha kaixa ne’e, hanesan baze ida bá ita oinsá mak sasán ne’e tama, no kotak sira ne’ebé mak tau osan ne’e rasik, sidadaun estranjeiru na’in-haat mak ita bolu mai halo identifikasaun, depois seluk tan ita sei bolu”, hakotu porta vos PNTL.

Entretantu iha prosesu indetifikasaun ba sidadaun estranjeiru nain haat ne’e ekipa DSIK rejista kedan kazu ne’e ho NUK: 0381/26.PNSIC, molok aprezenta ba Ministeriu Publiku ho evidensia sira hodi kontinua prosesu ba oin

𝐌𝐞𝐝𝐢𝐚 𝐏𝐍𝐓𝐋