DILI – Prosesu rekrutamentu ba membru PNTL foun iha tinan 2014 la’o ho transparante, tamba kandidatu sira ne’ebe atu kompete ba vaga 520 (atus lima ruanulu) liu husi prosesu ne’ebe rigorozu tebes. Informa Komandante Centru Formasaun ba Polisia, Superintendente Xefe Julio Hornai iha ninia kna’ar fatin Akademia Polisia Comoro-Dili, Tersa (17/09/2014). “Dala ruma publiku ka juventude sira ne’ebe la passa iha teste ne’e, sira lamenta katak prosesu rekrutamentu ba membru polisia foun ne’e halo nepotizmu, maibe ha’u hatete katak laiha nepotizmu tamba PNTL uza sistema “gugur” ne’ebe iha kada etapa sempre ema na’in ida hela, bainhira kandidatu ida la tuir kriteriu katak nia la aptu, nia simu notifikasaun fila ba uma, laiha ema ida ne’ebe hetan ajuda husi Instrutor sira”. Tenik Komandante Julio Hornai. Superintendente Xefe Hornai hatutan, iha etapa 10 (sanulu) ne’ebe kada kandidatu ida tenke tuir no aptu, mak hanesan selesaun dokumentus, prova kultural, hatudu dokumentus orijinal, prova biometria, prova aptidaun fíjiku, prova psikoteste, prova psikomotor, entrevista no médiku. Karik etapa sanulu ne’e liu hotu mak presija haree tan valor husi prova kultural, prova aptidaun fíjiku no prova psikoteste mak foin bele desidi katak kandidatu ne’e passa ka la passa. Iha parte seluk, Primeira Dama Isabel Ferreira nu’udar Prezidente ba Ekipa Tekniku Apoiu PNTL ne’ebe hala’o vizita ba Centru Formasaun Polisia foin lalais ne’e hateten, atu tama PNTL la fasil tamba liu husi kriteriu ne’ebe rigorozu tebes. “ha’u nia vizita ne’e hodi haree besik liu tan prosesu rekrutamentu ba membru PNTL foun liu-liu ba Ajente foun sira, ha’u haree katak afinal tama PNTL la’os fasil, se sira ne’ebe la tama, sira la prienxe kriteriu hanesan altura, labele iha tattoo, prova kultural, fijiku, mediku, entrevista, psikoteste, no liu husi prosesu naruk mak foin bele tama PNTL, ami vizita mak hodi hatene, selae alin sira ne’ebe la liu sira ba halo keixa ba iha fatin seluk hodi dehan katak PNTL halo nepotizmu, hatama deit nia familia, maibe iha realidade kuandu ita haree prosesu ne’e laos hanesan saida mak ema ko’alia iha li’ur”. Hateten Primeira Dama. Ikus liu Prezidente Ekipa Tekniku Apoiu PNTL Isabel Ferreira husu ba kandidatu sira ne’ebe agora dadauk sei iha prosesu laran hodi kompete ba vaga PNTL nian, tenke tuir duni prosesu ne’ebe iha, no prepara an didiak atu sai polisia ida tenke sai duni polisia ida ne’ebe professional, nakonu ho domin no paixaun ba karreira no profisaun ne’ebe sira eskolla, atu servi povu no Nasaun ida ne’e, no mantein lei no ordem iha ita nia Nasaun hanesan Estadu de Direitu Demokratiku. Entertantu prosesu rekrutamentu ba membru PNTL foun ne’e besik remata ona, no hein rezultadu ikus ba kandidatu sira ne’ebe mak passa iha loron 10 fulan Outubru 2014. Mídia PNTL.