Dili– Cruz Vermelha Timor Leste (CVTL) oferese treinamentu primeiru sokoru baziku ba funsionariu sivil ne’ebe servisu iha seksaun lojístika parte mekánika PNTL durante loron 3 ne’ebe hahú husi loron 21-23 Abril 2015, iha Edifísiu CVTL Bidau Sta. Ana, Dili. Objetivu husi treinamentu primeiru sokoru ne’e atu bele hasa’e koñesimentu funsionáriu mekánika sira atu bele proteje sira nia-an bainhira hetan kanek ruma iha isin lolon nomos bele ajuda ema seluk. “Treinamentu primeiru sokoru ne’e importante ba sira liu-liu ba mekanika sira tamba dala ruma sira tenke liga aki, sobu karreta, dala ruma aki ben kona sira nia liman, isin, matan no dala ruma liman sira kanek, bubu, ida ne’e importante ba sira,” afirma First Aid Training Manager CVTL Mariano de Jesus Pereira ba média PNTL iha Edifísiu CVTL, loron Kinta (23/04/2015). Mariano de Jesus Pereira hatutan, iha parte seluk treinamentu primeiru sokoru ne’e importante mos ba membru PNTL hotu tamba sira sempre halo patrullamentu, no sira mak ema primeiru ne’ebe hasoru vitima sira ne’ebe hasoru problema, hetan asidente trafiku, no seluk tan, tamba ne’e sira tenke iha koñesimentu ba ida ne’e, molok lori vitima ba ospitál. Treinamentu ne’e fó ba funsionariu sivil ne’ebe servisu iha mekánika PNTL hamutuk nain 7 ne’ebe fahe ba grupu 2 (rua), primeiru grupu tuir hala’o tiha ona iha fulan Marsu tinan ida ne’e, no segundu grupu mak hala’o iha fulan Abril. Iha fatin hanesan, partisipante Mariano Soares nuudar funsionariu sivil mekanika PNTL hateten, nia sente kontente hodi partisipa iha treinamentu ne’e, tamba treinamentu primeiru sokoru ne’e foin primeira vez nia hetan husi CVTL, no liu husi treinamentu ne’e bele ajuda sira iha servisu fatin bainhira hetan kanek ruma, no sira mos bele ona hodi proteje-an nomos bele ajuda ema seluk no familia. Média PNTL.