Dili– Unidade Polisia Maritima (UMP), Polisia Nasional Timor Leste desde harii iha tinan 2001 to’o 2010, sempre hasoru problema hanesan edifísiu, fasilidade, rekursu umanu, no formasaun ba iha área espesializada, maibe iha tinan 2010, Komando Jerál nomeia Superintendente Lino Saldanha hodi sai Komandante ba UPM, durante tinan 5 nia laran, unidade Maritima dezenvolve ho signifikativu. “Husi tinan 2001 to’o 2010 unidade ida ne’e hasoru difikuldade boot hanesan laiha kondisoens, laiha edifisiu ketak, kapasitasaun ba membru sira, no fasilidade, preokupasaun ida ne’e hanesan fator importante ne’ebe iha tempu ne’eba membru hasoru, unidade ne’e hasoru no instituisaun PNTL hasoru, maibe iha tinan 2010 bainhira Komando Jerál nomeia ha’u, agora ita boot sira bele haree katak unidade ida ne’e iha duni ona mudansa hanesan kuartel UPM, membru sira tuir formasaun, iha fasilidade maibe ró 10 mak agora aat ona, tamba ne’e husu ba Komandante Jeral atu bele haree ba kestaun ne’e,” afirma Komandante UPM, Superintendente Lino Saldanha iha nia diskursu ba komemorasaun aniversáriu UPM nian ba dala XIV iha Kuartel UPM, Lecidere-Dili, loron Domingu (10/05/2015).
Superintendente Lino hatutan, iha ninia prinsípiu hakarak atu hadi’a, no tinan 5 ona Lino komanda iha unidade ne’e no hadi’a ona, tamba ne’e husu ba Komandante Jerál hodi bele muda fali ba fatin seluk atu bele hadi’a, karik nafatin deit iha UPM, sei la dezenvolve nia-an. Komandante UPM hato’o mos servisu UPM ne’ebe durante ne’e hala’o mak hanesan, navegasaun (kontrola ró ne’ebe la’o iha tasi laran, katak presija iha mapamentu, presija rute ne’ebe klaru), salvamentu marítima (komunidade ne’ebe uja tasi ho ro, UPM tenke prontu ho kapasidade ne’ebe naton hodi salvamentu maritima ba komunidade tomak ne’ebe uja tasi), search and rescue (karik iha asidente ruma oinsa atu bele salva), protesaun ba ambiente tasi (oinsa bele proteje tasi ne’e diak bele uja ba jerasaun tuir mai), no ikus liu mak frakeja no ameasas ba ita nia tasi (atu haree ba atividade ilegal ne’ebe tama sai liu husi tasi). Atu kontrola tasi ho di’ak, presija aumenta rekursu umanus no kapasitasaun atu nune’e UPM bele prontu nafatin hodi kontrola tasi, afirma Lino Saldanha. Iha fatin hanesan, Komandante Jerál PNTL, Komisáriu Julio da Costa Hornai iha nia diskursu hateten, orgullu ho kompetensia ne’ebe Unidade Polisia Marítima hatudu ona, hodi halo vijilánsia no fiskalijasaun ba tasi espesial liu ba kombate kontra droga, peska ilegal, trafiku umanu, terorizmu no asaun ilegal sira. “Ohin imi halo tinan 14, kompara ho ita ema karik imi iha idade joven, hatene ona ida ne’ebe sala no loos, tamba ne’e to’o ona tempu atu hatudu profesionalizmu, fou-foun harii unidade ida ne’e iha fatin kiik ida iha Kuartel Jeral, komesa ona loke an ho situasaun ida ne’ebe komplikadu, maibe iha 2010 bainhira nomeia Superintendente Lino Saldanha, fo fiar ba nia hodi lidera unidade ida ne’e, to’o ohin loron iha dezenvolvimentu ne’ebe signifikante tebes, dala ida tan ha’u lori komando jeral nia naran hato’o parabens ba Komandante UPM ne’ebe servisu maka’as hodi lori unidade ida ne’e ba oin,” afirma Komisariu Julio Hornay. Partisipa iha serimonia aniversariu ne’e mak Embaxador Korea, komandante Unidade, seksaun, Departamentu husi Komando Jerál, Diretor Pescas husi Ministeriu Agrikultura no Peskas, Diretores sira husi ALfandega, Migrasaun, Karantina, no sira seluk ne’ebe durante ne’e sai parseiru ba UPM, membru UPM ho nia familia sira. Média PNTL.
