Dili– Membru PNTL na’in 5 (lima) ne’ebe hetan bolsu estudu husi Ministériu Edukasaun iha tinan 2010 hodi ba estudu kona-ba Siensia Kriminolojia iha Nasaun Filipina remata ona sira nia estudu no prontu atu apoiu ba Instituisaun Polisia Nasional Timor Leste. Membru PNTL na’in 5 ne’e estuda iha Universidade Angles University Foundation Philippines durante tinan 4 ho balun nia laran, no siensia ne’ebe sira aprende iha pontu importante 2 mak investigasaun kriminal no kriminalistik. “Siensia ne’ebe ami aprende iha pontu importante 2 mak investigasaun kriminal sei haree ba kazu droga, krime organizadu no investigasaun, no kriminalistik iha área 5 mak hanesan área forensic ballistic, firing examination, posting document, finger print examination, no polygraph examination (Timor Leste seidauk iha),” afirma Ajente Prinsipal Gastao Maria da Piedade ba Jornalista sira iha Aeroportu Internasional Nicolau Lobato, Kinta feira (14/05/2015), hafoin fila husi Filipina. 
Gastão Piedade akresenta katak, polisia iha nasaun hotu, sira iha ona laboratóriu investigasaun kriminal nian, Timor Leste sei iha prosesu nia laran. Tamba ne’e hein katak bele harii tan laboratoriu investigasaun kriminal ne’e, tamba dala barak prosesu balun ne’ebe to’o iha Tribunal dala ruma pendente, tamba ita la konsege prova evidensia iha Tribunal liu husi sientífiku, ida ne’e mak difikuldade ne’ebe kontinua infrenta.Bolseiru Piedade afirma, iha ezaminasaun ba prosesu kazu ida, presija prepara iha parte 2, mak prosesu mekanikal mak ema ne’ebe estuda iha área kímika nian, sira nee mak prepara kímika para oinsa bele halo testu, no segundu mak prosesu kimikal mak sira ne’ebe estudu kona-ba siensia kriminolojia nian hodi oinsa bele servisu hamutuk. Piedade hatutan prosesu juridiku kompara ho nasaun seluk, kuaze nia prosesu hanesan, nune’e presija aumenta deit fasilidade hodi bele ajuda efisiensia no efikasia servisu polisia nian iha kontekstu prepara prosesu kriminal nian. Iha parte seluk, Segundu Komandante Jerál Komisáriu Faustino da Costa hateten, membru na’in 5 ne’ebe remata ona sira nia estudu iha Filipina, Komando sei halo kolokasaun ba área ne’ebe tuir sira nia kapasidade ne’ebe sira hetan ona. “Kona-ba Laboratoriu kriminal nian seidauk iha, PNTL iha mak Laboratoriu Forénsiku ne’ebe durante ne’e uza, no iha fasilidade naton hodi bele hala’o servisu, maibe presija harii fali Edifisiu foun ida ba Laboratoriu Forensiku ne’e atu nune’e bele tau hotu fasilidade hirak ne’e,” afirma Komisariu Faustino. Média PNTL.
