Dili- Prezidente Repúblika (PR) Taur Matan Ruak hala’o vizita ba Polísia Nasionál Timor Leste (PNTL) iha kuarta (10/06/2015) iha Kuartel Jerál PNTL, Caicoli-Dili relasiona ba programa vizita ne’ebe mak Prezidente hala’o iha Munisipiu 13 iklui suku sira iha territóriu tomak.
Iha vizita ne’e Prezidente Repúblika sente orgullu ho mudansa ne’ebe mak PNTL hatudu durante ne’e, hodi asegura paz no estabilidade iha rai laran.
“Ha’u kontente haree mudansa boot PNTL nian iha tinan 13 nia laran, liu-liu iha tinan 6 ikus ne’e iha mudansa nebe maka’as, ne’e la’os de’it relatoriu ne’ebe Komandante Jerál informa mai ha’u, maibe liu husi vizita ba suku sira ne’ebe durante ne’e ha’u ba, povu fó avaliasaun ne’ebe di’ak ba dezenvolvimentu PNTL nian, tamba ne’e ha’u enkoraja nafatin PNTL atu bele servisu maka’as liu tan, tamba Povu no Nasaun presija PNTL nia tulun,”informa Prezidente Repúblika Taur Matan Ruak.
Prezidente hatutan, kualker Estadu iha mundu, iha pontu importante 2 mak Estadu hakarak mak hametin paz no estabilidade iha rai laran, no prosperiedade (moris diak) ba povu.
Pontu 2 ne’e sagradu ne’ebe la’os PNTL de’it mak hala’o misaun ne’e, maibe ema hotu liu-liu Ministériu sira ne’ebe relevante tenke servisu hamutuk atu nune’e bele asegura seguransa iha ita nia rai laran hodi fó prosperiedade ba povu.
Se estabilidade no paz laiha mak dezenvolve mos sei laiha, tamba ne’e husu ba PNTL atu servisu di’ak liu tan no tenke preparadu, tamba dezenvolvimentu ba oin, dezafiu no problema mos aumenta.
Iha parte seluk, PR Taur husu ba PNTL atu hametin relasaun diak ho komunidade hodi oinsa PNTL promove polisiamentu komunitária, atu nune’e komunidade sira mos fó sira nia kontribuisaun ba paz no estabilidade.
Nune’e mos PNTL tenke hadi’a servisu polísia tránzitu nian atu bele redúz asidente tráfiku ne’ebe akontese bebeik iha Nasionál nomos iha Munisípiu sira, tamba dala barak asidente tráfiku ne’e sempre hatudu númeru aas, tamba ne’e Prezidente no Nasaun preokupa ba kestaun ne’e.
“Tránzitu sira servisu hamutuk ho joven no univesrsitariu sira, dehan ba sira katak ita nia vida ne’e importante, ne la fa’an no la sosa iha merkadu, tamba Estadu presija ema ne’ebe iha saude di’ak atu bele kontribui ba Estadu, kada fulan estatístika ne’ebe Komandante fó númeru asidente aas, kanek, mate, mate liu fali funu ida, liman ain tohar liu fali tiru malu, ida ne’e mak Prezidente preokupa,” akresenta Prezidente Repúblika. Média PNTL.