Dili- Dala barak públiku kestiona bebeik ba servisu Empeñamentu Operasaun Conjunto (EOC), kompostu husi Polisia Nasional Timor Leste (PNTL) no Falintil Forsa Defeza Timor Leste (F-FDTL) ne’ebe kumpri rezolusaun husi Parlamentu Nasional hodi ba buka tuir Mauk Moruk ho nia membru sira ne’ebe halo ona krime hasoru seguransa Estadu nian.
Operasaun Konjunta ne’e hala’o abertura iha Kampu Aviasaun Lanud Munisipiu Baucau iha loron 21 fulan Marsu 2015, ne’ebe operasaun ne’e hanaran “HANITA” katak liu husi dalan hamaus ka halo aproximasaun de’it ho Mauk Moruk ho nia elementu sira atu koopera ba Justisa, labele uza forsa hasoru sira.
Iha faze dahuluk durante fulan ida nia laran, EOC kumpri ordem liu husi Rezolusaun ne’e hodi halo aproximasaun ho komunidade sira, no konsege membru husi grupu Mauk Moruk nian barak mak intrega-an ba EOC no hakarak atu koopera ba Justisa, maibe Mauk Moruk rasik ho nia elementu imporante balun seidauk intrega-an hodi koopera ba Justisa, no sira kontinua subar-an.
Operasaun “HANITA” ne’e tuir lolos hala’o deit fulan ida, maibe tamba Mauk Moruk ho nia elementu importante balun seidauk intrega-an, tamba ne’e EOC kontinua ba faze daruak hodi kontinua buka tuir Mauk Moruk liu husi dalan aproximasaun atu Mauk Moruk rasik mak intrega-an ba hodi responsavel ba asaun ne’ebe sira halo hasoru Instituisaun Seguransa Estadu nian.
Operasaun hala’o besik fulan tolu nia laran EOC seidauk konsege nafatin hetan Mauk Moruk nuudar alvu importante ba operasaun ne’e, tamba komunidade lakohi fó informasaun ba EOC hodi bele kaptura Mauk Moruk.
Tamba ne’e Komandante Jerál PNTL, Komisáriu Júlio da Costa Hornay husu nafatin ba komunidade hotu atu fó informasaun ba parte polisia atu nune’e bele kaptura Mauk Moruk.
“EOC seidauk kaptura Mauk Moruk tamba ema hotu lakohi fó informasaun ba ami oinsa mak ami bele kaptura Sr. Mauk Moruk, ita nuudar Timor oan hotu ne’ebe hakarak moris iha paz no estabilidade nia laran, ita hotu iha dever atu kontribui hodi hato’o informasaun ba EOC atu nune’e bele kaptura lalais, karik la fó informasaun mak KOK sei esforsu an nafatin,” afirma Komandante Jerál PNTL, Komisáriu Júlio Hornay ba Jornalista sira iha Kuartel Jerál PNTL, Caicoli-Dili, loron Kuarta (15/07/2015). Média PNTL.
