Dili– Hafoin Empeñamentu Operasaun Konjunta (EOC) retira husi operasaun iha loron 18 fulan Agostu foin lalais ne’e, to’o agora membru Konsellu Revolusionáriu Maubere (KRM) hamutuk na’in 6 mak seidauk entrega-an no kontinua subar.
Ho nune’e Komando PNTL Munisípiu Baucau husu ba elementu Mauk Moruk (MM) hamutuk na’in 6 (neen) ne’ebe kompostu husi Lemorai, José Sunardy no na’in 4 seluk atu bele entrega-an ba Komando Polisia Baucau.
“Sira ne’ebe seidauk kaptura agora hela sira na’in 6 de’it ona, sira mak Lemorai, José Sunardy ho na’in 4 seluk tan, sira na’in 6 ne’e husi Postu Administrativu Baguia na’in 2 no husi Postu Administrativu Laga na’in 4,” afirma Komandante PNTL Munisípiu Baucau, Superintendente Justino Menezes ba Jornalista sira iha Salaun Konferénsia Kuartel Jerál PNTL, Caicoli-Dili loron Kinta (27/08/2015) hafoin enkontru ba programa Polisiamentu Komunitaria nian.
Komandante Justino hatutan, foin lalais ne’e, elementu MM nian hamutuk na’in 16 (sanulu resin neen) entrega-an ona ba Komando PNTL Munisipiu Baucau, na’in 16 ne’e kompostu husi nain 10 husi Kribas Manatuto no nain 6 husi Postu Administrativu Laga nian.
“Sira na’in 6 ne’ebe seidauk entrega-an ida ne’e responsavel komando PNTL Munisipiu Baucau nian. Ami mak sei uza maneira oinsa para lori sira mai lalais, liu husi dalan aproximasaun ho nia familia sira, dialogu aberta, sosializasaun liu husi Xefe Aldeia, Xefe Suku sira atu nune’e sira bele entrega-an laiha hodi kro’at hasoru sira,” tenik Menezes.
Hatan kona-ba diskonfia elementu nain 2 ne’ebe seidauk entrega-an hanesan Lemorai ho José Sunardy halai ho kanek, Komandante Baucau hateten sira ne’ebe seidauk entrega-an fiar katak sira ne’e diak hela, nune’e mos diskonfia lori armas, komandante dehan sira lalori armas, karik iha sira halo rasik, bolu rakitan.
Komando PNTL Munisipiu Baucau hala’o nafatin diálogu liu husi Ofisial Polisia Suku (OPS) sira ho komunidade no autoridade lokal sira atu nune’e bele konvense ba familia sira atu nune’e sira bele entrega-an.
Ikus liu Komandante Justino husu ba komunidade tomak liu-liu Munisípiu Baucau katak Komando PNTL Munisípiu Baucau hakarak fo korajen nafatin, liu-liu ba familia sira atu kontribui hodi sira bele entrega-an, karik lakohi kontribui mak konsekuénsia realidade ita haree ona, katak mai ho kanek no mate, ne’e ita triste. Atu labele akontese tan husu ba familia sira atu labele subar, familia sira ne’ebe subar, konsidera sira komete krime. Média PNTL.
