Dili– Komando Jerál Polisia Nasional Timor Leste (PNTL) ho Sekretaria Estadu ba Apoiu Promosaun no Sosio Ekonomiku ba Feto ka hanaran SEM agradese ba perita internasional husi Komité CEDAW (The Committee on the Elimination of Discrimination against Women) ka Komité ba Eliminasaun no Diskriminasaun kontra Feto Dra. Pramila Patten ne’ebe fahe ona esperiénsia ba delegasaun Timor Leste nian ne’ebe tuir ajenda sei ba halo aprezentasaun kona-ba relatóriu CEDAW ba daruak no datoluk iha Jenebra.
“Komando Jerál PNTL agradese tebes ba perita husi Komité CEDAW nian ne’ebe ho esforsu hodi fahe ona ita nia esperiensia ba ekipa Timor Leste ne’e, atu nune’e sira bele prepara-an di’ak liu tan molok ba halo aprezentasaun iha Jenebra,” afirma 2 Komandante Jeral PNTL, Komisáriu Faustino da Costa iha enseramentu atividade treinamentu kapasitasaun ba delegasaun Timor Leste nian ne’ebe organiza husi SEM iha Salaun Konferensia Kuartel Jeral PNTL, Caicoli-Dili, loron Sesta, 25/09/2015.
Delegasaun ne’e kompostu husi Ministeriu 7 ne’ebe lidera husi SEM mak hanesan Ministeriu Interior, Edukasaun, Saude, Solidadriedade Sosial, Justisa, Administrasaun Estatal, no SEM hamutuk na’in 20 mak sei ba halo aprezentasaun ne’e.
Komisáriu Faustino hatutan, karik iha dadus balun ne’ebe liga ho servisu VPU (Unidade ba Ema Vulneravel) PNTL liu-liu ba kazu violénsia doméstika nian, PNTL pronto atu koopera bainhira SEM husu apoiu hodi halo kompletu ba dadus hirak ne’ebe seidauk, molok atu ba halo aprezentasaun iha komité ne’e.
Iha fatin hanesan, Diretora Jerál SEM Maria Sanches agradese ba perita Internasional Komité CEDAW nian ne’ebe fó ona kapasitasaun ba ekipa delegasaun ne’e, hein katak ekipa ne’e bele iha preparasaun ne’ebe di’ak molok ba halo aprezentasaun kona-ba relatóriu Timor Leste nian iha Komité CEDAW Jenebra.
“Relatóriu ne’e la’os SEM nian maibe Timor Leste nian, tamba ne’e liu husi treinamentu ne’e ekipa delegasaun Timor Leste bele prepara-an di’ak liu tan atu nune’e bele ba halo aprezentasaun ho di’ak iha komité CEDAW, treinamentu durante loron 4 ne’e utíl tebes ba partisipante sira hotu hodi aumenta sira nia kapasidade,” tenik Maria Sanches.
Aliende ne’e, Diretora Jerál SEM mos agradese ba Komando Jerál PNTL ne’ebe oferese fatin ba atividade treinamentu ne’e ho di’ak, no agradese mos ba partisipante sira hotu maske balun la inklui iha ekipa delegasaun ne’e, maibe partisipante sira hatudu ninia vontade komitmentu no responsabilidade hodi partisipa iha treinamentu ne’e, maske iha loron 24 nuudar loron feriadu, ekipa ne’e kontinua hala’o nia atividade, ida ne’e hanesan orgullu boot ba SEM.
Iha enseramentu ba treinamentu ne’e, Komando Jerál PNTL entrega mos lembransa PNTL ba Perita internasional komité CEDAW Dra. Pramila Patten.
Entertantu ekipa delegasaun Timor Leste ne’e sei ba halo aprezentasaun iha loron 11 Novembru 2015 kompostu husi Ministeriu 7 hamutuk na’in 20 inklui reprezentante PNTL na’in ida. Média PNTL.
