Dili– Aniversáriu Unidade Espesial Polisia (UEP) Polisia Nasional Timor Leste (PNTL) ba dala-6 tenke serví povu ho profesionalizmu no dedikasaun hodi garante paz no estabilidade iha komunidade nia le’et.
Komandante Jerál PNTL Komisáriu Júlio da Costa Hornay iha nia diskursu ba aniversáriu UEP ba dala-6 hateten profesionalizmu lia fuan ne’ebe instituisaun PNTL, governu no povu tomak hein husi UEP atu hatudu iha servisu, profesionalizmu bele alkansa bainhira iha disiplina ne’ebe forte, puntualidade, perfomansia ne’ebe di’ak husi ita nia-an rasik no fatin ne’ebe ita hala’o servisu, iha fatin ne’ebe de’it ita tenke hatudu étika, moral no atitude ne’ebe di’ak no seluk tan.
“UEP naran ne’ebe mak signifikadu tebes tamba ne’e tenke tane aas liu husi atitude, dedikasaun servisu no disiplina no prontidaun iha kualker tempu hodi kumpri misaun ho profesional hanesan Tema ba Aniversariu ne’e Com Profesionalismo Garantimos A Paz e Tranquilidade,” tenik Hornay iha Aniversáriu UEP ba dala-6 iha Kuartel UEP Bairo-Pite,Dili Segunda (28/09/2015).
Komisáriu Hornay hatutan, Komando jerál hato’o parabens no apresiasaun boot ba UEP nia dedikasaun servisu ne’ebe mak hala’o ba kualker operasaun nune’e mos husu ba membru Unidade Espesial tomak husi Ofisial, Sarjentu no Ajente atu halo reflesaun ida-idak nia-an hodi rekoñese errus ne’ebe karik komete no tenke prontu atu hadi’a-an.
“Dala barak imi hatudu ona atitude di’ak no dala barak mos imi viola. Hanesan imi nia Komandante Jerál ha’u apresia no kongratula ba hahalok di’ak hotu ne’ebe imi halo ona maibe ba buat hirak ne’ebe imi viola husu ba imi atu hadi’a liu-liu ba atitude brutalizmu, baku ema arbiru tamba de’it lia fuan espiritu de corpu, ida hetan baku seluk hamutuk ba ataka seluk lahatene se, komunidade ka imi nia maluk PNTL rasik ka se deit ida ne’e laloos, ha’u husu ba imi hotu atu halakon atitude ida ne’e no mantein imi nia komportamentu di’ak iha imi nia servisu laran,” tenik Hornay.
Iha fatin hanesan, Komandante Unidade Espesial Polisia Superintendente Xefe Afonso dos Santos hateten Komandante UEP nia servisu mak atu forma ema sai professional, disiplina no hatudu nia kapasidade hodi respeitu ba komunidade, membru sé de’it mak sala infrasaun disiplinar iha PNTL no komete krime todan sei prosesa tuir Kodigu Penal no Tribunal mak julga.
“Unidade Espesial Polisia ne’ebe PNTL harii ho misaun espesifiku ne’ebe hakerek iha artigu 26 lei organika PNTL iha alinea 1 hateten katak unidade ne’e hanesan unidade rezerva ida ne’ebe maka Komandante Jeral maka komanda, signifika katak komando Unidade Espesial nia deslokasaun nia servisu no atendementu servisu tenke ho ordem komandante jeral ba komandante Unidade,” afirma Komandante UEP Afonso.
Sup. Xefe Afonso hatutan, UEP iha membru kuaze na’in 700 ho sub unidade tolu (3) Batalaun Ordem Publika (BOP), Compania Operasaun Espesial (COE) no Corpo Seguransa Pessoal (CSP), no pelotaun Apoiu de Servisu ne’ebe kompostu husi BOP iha kompania Alfa no Charlie iha Dili, Bravo iha Baucau no Delta iha Bobonaro. Compania Operasaun Espesial (COE) nia membru labele liu na’in 100 tamba nia servisu atu atende risku boot kontra terorista no revem, CSP haree ba alta entidade se eis titulares aumenta entaun membru CSP mos aumenta.
Iha futuru UEP sei kria tan kompania Cinoteknika (anjing pelacak), no iha tempu badak sei haruka membru sira ba eskola iha Portugal durante tinan 4 ka 5 no presija kria mos kondisaun, orsamentu antes estabelese kompania Cinotekniaka, aliende ne’e sei kria tan Kompania Seguransa Onra e Estadu hodi destaka ba iha Palasiu Governu no fatin sensitivu iha Kapital Dili. Média PNTL.
