Dili– Ofisiais Superior na’in 7 (hitu) Polisia Nasional Timor Leste (PNTL) halo aprezentasaun kona-ba rezultadu estudu komparativu kona-ba polisia komunitaria ne’ebe sira hala’o iha Japaun no Indonesia ba Komando jeral PNTL iha Salaun konferensia Kuartel Jeral PNTL, Caicoli-Dili, loron Kinta (03/12/2015).
Ofisiais superior na’in 7 ne’e ba Japaun no Indonesia durante semana rua hahú husi loron 10 to’o 25 Setembru 2015, ne’ebe tuir ajenda iha Japaun husi 10-20 Setembru, no iha Indonesia husi loron 20-25 Setembru ne’ebe hetan apoiu husi Governu Japaun liu husi JICA iha Timor Leste.
Xefe Departamentu Polisia Komunitaria Nasional Superintendente Assistente Boavida Ribeiro hateten, objetivu husi Estudu Komparativu ne’e, atu ofisiais superior sir abele aumenta tan sira nia esperiensia iha area estratejia no operasaun polisia komunitaria nian.
Ofisiais Superior ne’ebe mak ba hala’o estudu komparativu iha Japaun no Indonesia mak hanesan Superintendente Xefe Armando Monteiro atual Komandante PNTL Munisipiu Bobonaro, Superintendente Marcos Sequeira atual Komandante PNTL Munisipiu Lautem, Superintendente Jorge N.A. Monteiro atual Komandante PNTL Munisipiu Manufahi, Superintendente Damião Pereira atual Komandante PNTL Munisipiu Aileu, Superintendente Assistente Euclides Belo atual Adjunto Komandante PNTL Munisipiu Dili, Superintendente Assistente Eduardo Campos atual Adjunto Komandante PNTL Munisipiu Liquica, no SUperintendente Assistente João Sancho Pires atual Komandante Unidade Patrullamentu Fronteira (UPF).
Tuir Reprezentante ofisiais superior PNTL ne’ebe ba hala’o estudu komparativu iha Japaun no Indoensia, Superintendente Xefe Armando Monteiro hateten, liu husi estudu komparativu ne’e sir abele halo komparasaun entre PNTL ho polisia Japaun no Indonesia hodi oinsa atu dezenvolve diak liu tan PNTL iha futuru liu-liu iha área estratejia no operasaun polisia komunitaria nian.
Entertantu, rekomendasaun ne’ebe mak ofisiais superior sira hato’o ba komando jeral atu haree mak hanesan presija kria deskrisaun ba sentru komunikasaun no sentru operasaun, moderniza sistema atendimentu komunidade no responde situasaun emerjensia, presija kria kondisaun hodi fo atendimentu ba komunidade, presija apoiu subsidiu ba familia ba implementasaun programa polisia komunitaria, kria uniformizasaun formatu ba atividade polisia komunitaria, presija apoiu ekipamentu seguransa pesoal no mobiliariu ba membru polisia komunitaria, no kontinua kapasita rekursu umanu avansadu no espesial.
Aliende ne’e, iha mos Ofisial Polisia Suku (OPS) hamutuk nain 30 (tolunulu) feto nain 2 no mane nain 28 ne’ebe reprezenta husi Munisipiu 13 hala’o mos estudu komparativu iha Indonesia (Denpasar Bali no Makasar Sulawesi) kona-ba sistema servisu OPS nian.
OPS na’in 30 ne’e ba Indonesia durante semana ida, husi loron 22-28 Novembru 2015.
Entertantu, Komandante Jeral PNTL Komisariu Julio da Costa Hornay agradese ba apoiu ne’ebe mak Governu Japaun liu husi JICA iha Timor Leste fo ba PNTL liu-liu iha area polisia komunitaria atu oinsa bele dezenvolve liu tan servisu polisia komunitaria nian iha Timor Leste.
“Agradese mos ba ofisiais superior no OPS sira ne’ebe mak ba halo estudu komparativu iha Japaun no Indonesia, iha ona rekomendasaun barak ne’ebe mak ohin hato’o, tamba ne’e husu ba Xefe Departamentu Polisia Komunitaria Nasional atu bele tuur hamutuk ho ofisiais superior sira atu bele haree PNTL presija adopta sistema ida ne’ebe mak diak,” afirma Komisariu Hornay.
Iha aprezentasaun rezultadu estudu komparativu ne’e, Komandante Jeral fahe mos sertifikadu ba ofisiais superior no OPS sira ne’ebe mak ba tuir estudu komparativu iha Japaun no Indonesia.
Partisipante ne’ebe partisipa iha aprezentasaun rezultadu estudu komparativu ne’e mak ofisiais superior komando jeral, reprezentante Embaxador Japaun iha Timor Leste, ekipa JICA no membru Polisia Komunitaria. Média PNTL.
