Ainaro-situasaun seguransa em jeral iha Munisipiu Ainaro lao di’ak ka kontroladu tamba komunidade sira koopera diak tebes ho Polisia Nasional Timor Leste hodi asegura seguransa iha sira nia Munisipiu rasik.
Komandante PNTL Munisipiu Ainaro Superintendente Orlando Gomes hateten, situasaun jeral iha Munisipiu Ainaro lao diak tamba komunidade rasik mak kontribui ba paz no estabilidade.
“Situasaun jeral iha Munisipiu Ainaro to’o ohin loron sei lao kontroladu, maske krime baibain ne’ebe mak sempre mosu tamba problema sosial, maibe situasaun jeral la’o diak,” informa Superintendente Orlando Gomes iha Salaun Administrasaun Munisipiu Ainaro bainhira loke abertura ba Jantar hamutuk liu husi programa polisiamentu komunitaria nian.
Komandante Orlando Gomes hatutan, ita hotu hamutuk atu kria unidade no amizade ne’ebe mak diak atu nune’e ita bele servi diak liu tan ita nia komunidade atu nune’e ita nia komunidade sira bele moris hakmatek, seguru no livre iha sira nia vida moris tomak hodi nune’e sira bele goza ba ukun rasik an ida ne’e ho diak.
“Ida ne’e mak servisu boot ba ita hotu tantu militar no sivil, ita nia objetivu mak servi ita nia komunidade, ita hotu esforsu ho ita nia ideias konstrutivu ita hamutuk ho ita nia autoridade sira hotu atu garnate estabilidade no paz ba ita nia Nasaun liu-liu ba ita nia Munisipiu, mai ita hamutuk atu prevene krime iha ita nia rai laran,” tenik Komandante PNTL Munisipiu Ainaro. Média PNTL.
