Ainaro– Governu Nova Zelandia liu husi TLCPP (Timor Leste Community Police Program) ne’ebe durante ne’e fo apoiu ba Polisia Nasional Timor Leste iha programa polisiamentu komunitaria (POLKOM) sei prolonga tan to’o tinan 2020.
Augusto Ferreira Soares hanesan Development Program Coordinator husi Embaxada Nova Zelandia iha Timor Leste hateten, objetivu husi apoiu ne’e mak atu dezenvolve no apoiu ba programa polisia komunitaria nian iha baze atu oinsa Timor oan rasik mak bele rezolve nia problema rasik.
“Esforsu ne’ebe durante ne’e Fundasaun Ázia no Governu Nova Zelandia apoiu ba PNTL liu husi polisia komunitaria la’o kapas tamba Governu Nova Zelandia nia hakarak mak Timor oan mak rezolve nia problema rasik diak liu duke ema seluk mak mai rezolve ita nia problema. Tamba Timor oan sira mak hatene nia situasaun, ninia difikuldade, problema saida deit mak iha, ikus mai bele buka nia solusaun hodi bele rezolve rasik,” afirma Augusto Soares hanesan reprezentante Embaxador Nova Zelandia iha Timor Leste bainhira partisipa serimonia Primeiru Sentru Aprendizajen Programa Polisiamentu Komunitaria iha Munisipiu Ainaro iha Salaun Paroquial Ainaro, sesta (18/12/2015).
Reprezentante Embaxador Nova Zelandia ne’e hatutan, governu Nova Zelandia nia apoiu ba polisia komunitaria ba faze primeiru hahú iha tinan 2008-2015, maibe sei kontinua ba faze segundu sei hahú iha 2016-2020.
Augusto Ferreira informa tan katak, programa ne’ebe sira apoiu ba polisia komunitaria durante ne’e mak iha komponente 3 mak hanesan estratejiku, operasaun no formasaun.
Komponente estratejiku mak haree liu ba oinsa dezenvolve politika sira ne’ebe mak bele fo vantajen ba programa polisiamentu komunitaria nian.
Komponente operasaun mak haree liu ba oinsa servisu besik liu ho PNTL hodi implementa servisu polisia komunitaria nian iha baze.
Komponetnte formasaun mak atu hasae kapasidade no koñesimentu individu polisia sira atu oinsa bele ajuda servisu hamutuk ho autoridade lokal sira hodi mantein seguransa iha komunidade nia leet.
Orsamentu ne’ebe mak durante ne’e governu Nova Zelandia apoiu ba programa polisiamentu komunitaria iha faze I ne’ebe hanaran programa pilotu hamutuk 14 milloens Dolar Nova Zelandia, no faze II mak sei aloka tan orsamentu hamutuk 11.9 Milloens Dolar Nova Zelandia.
Entertantu Komandante Jeral PNTL, Komisariu Julio da Costa Hornay agradese ba Governu Nova Zelandia no Fundasaun Ázia ne’ebe durante ne’e fo ona apoiu ba PNTL liu-liu ba polisia komunitaria, apoiu ne’ebe sira fo ajuda tebes servisu polisia nian iha baze, no husu ba membru polisia tomak atu labele depende liu ba apoiu husi doadores sira mak halo servisu, maibe tenke prontu hodi servi nafatin ba komunidade no nasaun, maske ho fasilidade ne’ebe mak mínimu. Média PNTL.
