Dili- Komandu Polisia Nasional Timor-Leste (PNTL) identifika ona suspeitu João Albino Gomes (JAG) ne’ebé komete kazu violasaun seksuál hasoru nia feen rasik nia alin ho naran inisial IPF, oras ne’e daudaun subar iha Kupang-Indonézia.
JAG nu’udar autór prinsipal ne’ebé komete kazu violasaun seksual hasoru nia feen nia alin IPF ne’ebé sai vítima.
Kazu ne’e rasik akontese iha loron Kinta (24/12/2015), bainhira suspeitu bosok vítima IPF atu ba foti dosi iha Manleuana, maibé derepente suspeitu lori fali vítima ba Tasi-Tolu ho karreta pajero suspeitu nia aman nian rasik hodi halo violasaun seksuál hasoru vítima iha karreta karan.
Kazu ne’e rejistu ona iha Eskuadra PNTL Komoro ho númeru inisial 0797/15/CMR, no rejista kedas iha Ministériu Públiku (MP) inklui mós evidénsia sira, nune’e MP haruka kedas karta mandatu kapturasaun ba Servisu Kriminal Nasional (SIKN).
Husi karta mandatu ne’e, Polisia Nasional Timor-Leste liu husi SIKN atu ezekuta kedas orden iha loron Segunda (11/01), maibé to’o iha hela fatin Quintal Boot, suspeitu JAG konsege halai hodi subar to’o agora deskonfia mosu fali iha Kupang.
“Ita identifika ona suspeitu ne’ebé mak hala’o relasaun seksuál hasoru nia feen nia alin iha tinan kotuk, iha Tasi-Tolu, agora suspeitu iha ona Indonesia (Kupang),” informa ofisial PNTL ne’ebé lakohi fó sai ninia identidade bainhira dada lia ho jornalista iha Komandu PNTL, Kinta (04/02).
Tuir, ofisial PNTL ne’e katak, suspeitu JAG bele halai no subar to’o iha ne’ebe de’it, maibé sei kaer nia hodi mai responsabiliza iha tribunál ba aktu ne’ebé nia komete ona.
Alende ne’e, vitima nia inan Teresinha Afonso hateten, suspeitu JAG ne’e halai tiha ona ba Kupang liu husi jalan tikus. Tanba ne’e nia husu tenke kaer suspeitu ne’e hodi ba hatan iha justisa.
“Buatamak ne’e kabur lakon tiha ona agora nia iha Kupang liu husi fronteira jalan tikus de’it, tanba ne’e hau husu ba polisia tenke kaer lalais nia ba hatan iha justisa,” dehan Teresinha ba jornalista, iha ninia hela fatin Manleuana, Kinta (04/02).
Nia hatutan katak informasaun sira ne’e nia parte hetan liu husi ninia oan feto nia kuñada ne’ebé dehan suspeitu halai subar ba iha Kupang no sira sei tranfere osan ba suspeitu hodi nune’e bele halai liu ba Bali.
Antes ne’e mós, vítima IPF konta katak iha dalan, nia parte husu suspeitu atu ba Manleuana maibé suspeitu nonok deit hodi xave tiha karrteta nia odamatan.
“Hau husu nia ba Manleuana saida maka ita liu fali iha ne’e (Tasi-tolu). Maibé maun xave tiha odamatan no hahu’u halo asaun krime to’o ikus halo violasaun seksuál ba hau hodi hau nia raan fakar barak iha kareta laran. Hau labele hakilar tanba nia buti hau nia ibun no ameasa hau labele fo sai se lae nia oho hau e fakar Fanta ba hau nia leten”, dehan vitima.
Vitima ne’e haktuir, antes atu halo violasaun, nia (suspeitu) ne’e sei husu vitima iha ona doben ka lae, nia komesa book ona vitima nia isin lolon.
Informasaun ne’ebe diáriu ne’e hetan, suspeitu ne’e la’os halo deit violasaun seksuál maibé nia mós ba halo ameasa ba vítima nia familia sira inklui baku rahun ninai uma rasik iha area Quintalboot.
Fonte: Independente, Edisaun Segunda 08 Janeiru 2016.
