Dili-Polisia Nasional Timor-Leste fo apoiu seguransa ba ekipa husi Munisipiu Dili ne’ebe maka halo operasaun hodi oho animal (fahi ) ne’ebe maka lao ba mai iha aldeia no suku iha Dili laran.
Komandante Jeral PNTL Komisariu Julio da Costa Hornay hateten polisia fo apoiu seguransa ba parte kompetente ne’ebe maka husu ajuda maibe operasaun oho animal iha sidade Dili laran ne’e laos polisia nia misaun, polisia so fo apoiu seguransa deit, Nia hato’o kestaun ne’e hafoin serimonia enseramentu estajiu ba kursu kontra terorismu no estaziu baze ba ajente UEP iha Kuartel UEP Bairo-Pite Dili, Kinta (14/04).
Ekipa operasaun animal husi munisipiu Dili kompostu husi Jestor saniamentu merkadu, no seguransa sivil, PNTL husi seksaun tasck Force maka fo apoiu.
Operasaun oho animal ne’e hanesan politika governu nian atu mantein Dili sidade ne’ebe moos nudar kapital nasaun nian, operasaun ne’e halao iha fulan Abril nia laran no konsege oho ona komunidade nia fahi hamutuk 80, maske hetan protesta husi komunidade maibe ekipa munisipiu Dili kontinua ejekuta politika governu nian.
Aliende fo apoiu seguransa ba ekipa munisipiu Dili, iha observasaun jornalista media PNTL, Polisia mos fo apoiu seguransa ba funsionariu Eletrisidade De Timor-Leste (EDTL) ne’ebe maka halo pasa revista ba ligasaun eletrisidade illegal no prepagu iha bairu-bairu iha sidade Dili hodi antisipa karik mosu problema no desintendementu entre funsionariu EDTL ho komunidade. Media PNTL.
