Dili, Komandu Polísia Nasional Timor-Leste (PNTL) munisipiu Viqueque halo ona prosesu investigasaun ba akontesimentu ahi han uma ida iha suku Bahalara Uain, postu administrativu Viqueque Villa, munisipiu Viqueque ne’ebe akontese iha loron 13 fulan Novembru tinan 2023.
Porta Voz Komandu PNTL Superintendente Polísia António da Luz liu husi konferensia imprensa tersa-feira (14/11) ne’e hateten akontesimentu ahi han uma ne’e akontese wainhira uma na’in ne’ebe nu’udar mós Xefe Suku Eleitu ba Períodu 2023-2030 laiha fatin akontesimentu tanba ba tuir hela Eleisaun Suku Segunda Ronde.
“Durante Eleisaun Suku Segunda Ronde, situasaun seguransa en jerál iha teritoriu Timor laran tomak lao kontroladu, maibe iha akontesimentu balun ne’ebe maka akontese iha munisipiu Viqueuqe, akonetse Xefe Suku eleitu ninia uma ahi han, ita nia Komandu PNTL munisipiu Viqueque halo kedas atuasaun hodi halo identifikasaun ba akontesimentu ne’e”, esplika Porta Voz Komandu PNTL ne’e.
Superintendente Polísia ne’e salienta tan katak oras ne’e dadaun Komandu PNTL munisipiu Viqueque halo hela prosesu indentifikasaun tanba suspeitu ka ema ne’ebe maka sunu uma ne’e deskoñesidu. Uma na’in rasik la hatene tanba momentu akontesimentu uma na’in ba hela partisipa iha eleisaun suku iha aldeia nian.
“Akontesimentu ne’e akontese iha oras tuku lima ho balun lokoraik, wainhira xefe suku eleitu ne’e iha hela fatin votasaun nian, nia haruka labarik na’in rua ba nia uma hodi foti karegor telefone (Cas Telefone) maíbe wainhira labarik na’in rua ne’e to’o iha xefe suku nia uma, ahi han tiha ona, sira rasik la hatene sé maka sunu tanba ne’e maka ita nia Polísia sira sei halo hela prosesu indentifikasaun atu hatene los motivu ba kazu sunu uma ne’e saida”, hatutan Superintendente Polísia ne’e.
Ofisias Superior PNTL ne’e subliña situasaun en jerál iha munisipiu Viqueque lao normal hela tanba membru PNTL sira mós asegura hela iha fatin akontesimentu tuir relatoriu ne’ebe maka mai husi Komandu PNTL munisipiu Viqueque.
Hatan kona-ba motivu husi akontesimentu ne’e karik iha ligasaun ho Grupu Arte Marsias ka lae, Superintendente Polísia ne’e esplika kona-ba ida ne’e seidauk bele hatene, wainhira iha prosesu investigasaun maka ita bele foin hatene. Tanba Komandu PNTL munisipiu Viqueque nian liu husi Servisu Investigasaun foti hela dadus, ema ne’ebe sunu uma ne’e deskoñesidu katak la hatene sé maka halo asaun ida ne’e.
“Orientasaun Komandu Jerál nian ba iha Komandu munisipiu sira, mantein nafatin atu asegura katak ita nia situasaun iha ne’eba tenke hakmatek atu komunidade sira bele halo sira nia servisu ho diak, nune’e Komandu PNTL munisipiu sira hotu garante katak situasaun lao normal hela tuir relatoriu ne’ebe mai husi Komandante munisipiu idak-idak hato’o mai Komandu Jerál katak situasaun temporariamente sei kontroladu”, hakotu Ofisias Superior PNTL ne’e. Media PNTL.
