Dili, Polísia Nasional Timor-Leste (PNTL) liu husi Centro Formacão Polícia (CFP) segunda feira ne’e (22/01) realiza graduasaun ba ajente rekruta hamutuk na’in 178 iha Kintu Kursu Formasaunn ba Ajente.
Primeiru Ministru (PM) Repúblika Demokratika Timor-Leste (RDTL) Dr. Marí Bin Amude Alkatiri hanesan alta entidade ba serimonia graduasaun ne’e iha ninia diskursu hateten, ohin loron sai hanesan loron ida espesial ba joven hamutuk 178, liu tiha fulan ne’en resin hetan treinamentu no formasaun no ohin sai polísia, tama iha institusaun polisial instituisaun ida importante ba Timor-Leste.
“Joven 178 hotu-hotu mai husi sira nia familia rasik, mai husi sira nia komunidade rasik, mai husi povu rasik agora fila hikas fali ba familia, ba komunidade, ba povu maibé bainhira sira to’o sira familia ida ne’e, komunidade ida ne’e no povu ida ne’e sira to’o ho misaun no vizaun foun, presija primeiru katak familia, komunidade komprende katak sira to’o ona hanesan polísia, polísia iha ninia funsaun”, hateten Primeiru Ministru RDTL iha CFP.
Alta entidade iha serimonia ne’e salienta liu tan katak, sá misaun no vizaun foun maka polísia tenke hatene maka misaun atu servi povu no servi estadu direitu demokrátiku, vizaun atu haburas fali instituisaun PNTL, atu desenvolve instituisaun ne’e atu sai exemplu bainhira ita halo relasaun ho ita nia povu, bainhira ita hakbesik ann ba povu ita tenke sai exemplu, exemplu atu buka dalan, atu hametin paz no estabilidade.
“Mai hetan formasaun sai polísia, laos deit hanesan hetan servisu bain-bain, servisu hanesan polísia signifika servisu atu servi loron-loron povu, atu povu bele iha konfiansa ba imi, atu povu bele tur hakmatek hatene katak iha instituisaun ida que tau matan ba sira, laos iha instituisaun ida que sai fali ameasa ba sira, ida ne’e importante tebes PNTL lao husi dalan naruk to’o ohin kintu kursu sai 178 PNTL husi dalan naruk ho dala barak lao ho funsaun ida que diak”, subliña Dr. Marí Bin Amude Alkatiri.
Iha fatin hanesan, Komandante Jerál PNTL Komisariu Polísia Julio da Costa Hornay iha ninia intervensaun ba serimonia ne’e hateten ohin loron importante ba ita hotu tanba joven polísia hamutuk 178 aumenta tan ba efetivu iha instituisaun PNTL hafoin periodu fulan ne’en ba formasaun ida que forte.
“Nu’udar loron ida importante ba instituisaun nune’e la haluha saida maka ita nia joven sira hili assume komprimisiu no la tau reserva hodi serve Timor-Leste no Timor oan sira no husik hela sira nia direitu nu’udar sidadaun atu sidadaun sira seluk bele goza ho diak liu tan tanba importante duni aktu símboliku ida ne’e hamutuk ho sosiedade ne’ebe reprezenta husi familia no amigo sira husi elementu foun PNTL maluk sidadaun sira ne’ebe sempre hamutuk ho ita no nain ulun sira iha vida politika no sosial ho sira nia presensa fó honra no dignidade ba serimonia ida ne’e”, dehan Komandante Jerál PNTL ne’e.
Nune’e mós iha biban ida ne’e, Komandante CFP Superintendente Polísia Arquimino Ramos hateten prosesu formasaun atu muda mentalidade sivil ba polísia presija liu husi sistema polítika formasaun no kurikulu ida ne’ebe diak no relevante ho situasaun no kondisaun ne’ebe Timor-Leste iha no la haluha norma sira ne’ebe aplika universal (Think globally act locally).
“Formasaun ba polísia foun sira ho nivel ajente nu’udar formasaun prinsipal hodi forma karakter no kompetensia ajente polísia hodi servi no protégé povu sira ne’ebe sira atu servi ba, ne’e duni iha sistema formasaun ida ne’ebe adekuadu no iha kualidade hodi hari’I karakter individu sai ema ne’ebe ho karakter nu’udar membru polísia ho filosofia identiku ho militar tuir Lei Organika PNTL Dekretu Lei Nu. 9.2009”, tenik Komandante CFP ne’e.
Superintendente Polísia Arquimino Ramos subliña liu tan katak formasaun ida ne’e hala’o ho durasaun fulan ne’en ho total karga horaria ho oras 840 no sira tenke kompleta iha Bloku formasaun tolu maka hanesan Bloku formasaun baze, bloku formasaun eskolar no bloku formasaun ezersisiu. Durante formasaun hahu’u husi formasaun baze, ajente rekruta na’in tolu resigna ann tanba moras no ida elemina tanba infrasaun disiplinar no sira ne’ebe simu graduasaun hamutuk na’in 178 sira ne’e hotu-hotu mane no sira pasa ho valor media final 14,22 ho nota másimu ka ass liu maka 17,74 no nota minima maka 11,04 no mós laiha re-exame.
Marka iha serimonia graduasaun ne’e Primeiru Ministru RDTL, Ministru Defesa no Seguransa Jose Agostinho Sequeira Somocho, Komandante Jerál PNTL, Xefe Estado Maior F-FDTL Major Jeneral Lere Anan Timur, sekretariu Estadu Komunikasaun Sosial Matias Boavida, Provedoria Direitus Humanus e Justisa (PDHJ) Silveiro Pinto, Embaixador Portugal iha Timor-Leste, Adidos Seguransa no Polícia, membru governu, Ofiais, Sarjentos no Ajente inklui familia graduadu sira.
Media PNTL.
